hamd

ai ḳhudā hai tū hī mālik-e-do-jahāñ

terī qudrat ke jalve haiñ har sū ayaañ

jagmagā.īñ tire nuur kī bhiik se

chāñd-tāre kiran chāñdnī kahkashāñ

phuul shabnam chaman rañg ḳhushbū dhanak

sab ke sab haiñ terī azmatoñ ke nishāñ

peḌ-paude terī hukmarānī meñ haiñ

tere hī hukm se haiñ samundar ravāñ

terā kalima havāoñ ke hoñToñ pe hai

gūñjtī hai fazāoñ meñ terī azaañ

har bulandī tere sāmne past hai

tere aage jhukā.e hai sar-e-āsmāñ

haath uThā kar yahī māñgte haiñ duā

kar de har dil ko tū pyaar kā gulsitāñ

ai KHuda hai tu hi malik-e-do-jahan

teri qudrat ke jalwe hain har su ayan

jagmagain tere nur ki bhik se

chand-tare kiran chandni kahkashan

phul shabnam chaman rang KHushbu dhanak

sab ke sab hain teri azmaton ke nishan

peD-paude teri hukmarani mein hain

tere hi hukm se hain samundar rawan

tera kalima hawaon ke honTon pe hai

gunjti hai fazaon mein teri azan

har bulandi tere samne past hai

tere aage jhukae hai sar-e-asman

hath uTha kar yahi mangte hain dua

kar de har dil ko tu pyar ka gulsitan