hamd ke mani

ghar se jā kar roz savere

maktab aa kar roz savere

jo naġhme gaate ho aksar

gā kar lahrāte ho aksar

hai to vo bhī hamd ḳhudā kī

hamd ḳhudā-e-arz-o-samā kī

lekin vo tārīf bhī kyā hai

sirf zabāñ par jis kī sadā hai

ma.anī haiñ ye hamd ḳhudā ke

hamd ḳhudā-e-arz-o-samā ke

rab ke naam meñ hai jo nekī

vo ham meñ paidā ho nekī

naam hoñ rab ke jis se raushan

kaam hoñ rab ke jis se raushan

kartā hai vo ehsāñ sab par

kyā aaqil kyā nādāñ sab par

ham bhī Dāleñ ḳhū-e-ehsāñ

ham meñ bhī ho bū-e-ehsāñ

raaja yā kañgāl ho koī

gorā ho yā laal ho koī

us kī nazar meñ sabhī barābar

us ke ghar meñ sabhī barābar

ham bhī barābar jāneñ sab ko

ham bhī barābar māneñ sab ko

ro.ab na māneñ dhan daulat kā

farq na jāneñ dhan daulat kā

mazlūmoñ kā haamī hai vo

māsūmoñ kā haamī hai vo

ham bhī logoñ ke kaam aa.eñ

un ke har dukh ko apnā.eñ

hindū muslim sikh īsā.ī

ammī abbā bahnā bhaa.ī

ye to haiñ sab naam hamāre

dekhtā hai vo kaam hamāre

achchhā kaam hai us ko pyārā

nek anjām hai us ko pyārā

ham bhī sab kā rutba māneñ

ham bhī sab ko achchhā jāneñ

jin logoñ ke kaam haiñ achchhe

kāmoñ ke anjām haiñ achchhe

bure bhale se vāqif hai vo

khule Dhake se vāqif hai vo

ham bhī apnā ilm baḌhā.eñ

qudrat ke rāzoñ ko paa.eñ

zālim se hai bair ḳhudā ko

parmeshvar ko an-dātā ko

bas phir ham par farz yahī hai

'zeb' kī tum se arz yahī hai

apnoñ par kyā begānoñ par

rahm karo sab insānoñ par

achchhe insāñ ban ke dikhā do

hamd ke ma.anī sab ko batā do

ghar se ja kar roz sawere

maktab aa kar roz sawere

jo naghme gate ho aksar

ga kar lahraate ho aksar

hai to wo bhi hamd KHuda ki

hamd KHuda-e-arz-o-sama ki

lekin wo tarif bhi kya hai

sirf zaban par jis ki sada hai

mani hain ye hamd KHuda ke

hamd KHuda-e-arz-o-sama ke

rab ke nam mein hai jo neki

wo hum mein paida ho neki

nam hon rab ke jis se raushan

kaam hon rab ke jis se raushan

karta hai wo ehsan sab par

kya aaqil kya nadan sab par

hum bhi Dalen KHu-e-ehsan

hum mein bhi ho bu-e-ehsan

raja ya kangal ho koi

gora ho ya lal ho koi

us ki nazar mein sabhi barabar

us ke ghar mein sabhi barabar

hum bhi barabar jaanen sab ko

hum bhi barabar manen sab ko

roab na manen dhan daulat ka

farq na jaanen dhan daulat ka

mazlumon ka hami hai wo

masumon ka hami hai wo

hum bhi logon ke kaam aaen

un ke har dukh ko apnaen

hindu muslim sikh isai

ammi abba bahna bhai

ye to hain sab nam hamare

dekhta hai wo kaam hamare

achchha kaam hai us ko pyara

nek anjam hai us ko pyara

hum bhi sab ka rutba manen

hum bhi sab ko achchha jaanen

jin logon ke kaam hain achchhe

kaamon ke anjam hain achchhe

bure bhale se waqif hai wo

khule Dhake se waqif hai wo

hum bhi apna ilm baDhaen

qudrat ke raazon ko paen

zalim se hai bair KHuda ko

parmeshwar ko an-data ko

bas phir hum par farz yahi hai

'zeb' ki tum se arz yahi hai

apnon par kya beganon par

rahm karo sab insanon par

achchhe insan ban ke dikha do

hamd ke mani sab ko bata do