hamein KHanon mein mat banTo

hameñ ḳhānoñ meñ mat bāñTo

ki ham to raushnī Thahre

kisī dahlīz par jalte hue shab bhar

kisī kā rāsta takte

charāġhoñ se bhī aage hai jahāñ apnā

ujāloñ kī kumak le kar

añdhere kī safoñ ko chiir jaate haiñ

ye jugnū chāñd aur taare

hamārī sūrateñ jaise

hameñ ḳhānoñ meñ mat bāñTo

havā haiñ ham

bhalā dīvār-o-dar meñ qaid kyā hoñge

sunahrī sub.h Dhaltī shaam kī rāhat hamīñ se hai

hameñ mīzān par rakhne se pahle

tolne se qabl itnā soch lenā hai

hamārā bojh terī band muTThī meñ dabī rassī

uThā.egī bhalā kaise

ki ham to shash-jihat meñ

jis taraf nazreñ uThāo

dekh lo phailī huī bikhrī huī ham ko

ki ham to zindagī haiñ

hamein KHanon mein mat banTo

ki hum to raushni Thahre

kisi dahliz par jalte hue shab bhar

kisi ka rasta takte

charaghon se bhi aage hai jahan apna

ujalon ki kumak le kar

andhere ki safon ko chir jate hain

ye jugnu chand aur tare

hamari suraten jaise

hamein KHanon mein mat banTo

hawa hain hum

bhala diwar-o-dar mein qaid kya honge

sunahri subh Dhalti sham ki rahat hamin se hai

hamein mizan par rakhne se pahle

tolne se qabl itna soch lena hai

hamara bojh teri band muTThi mein dabi rassi

uThaegi bhala kaise

ki hum to shash-jihat mein

jis taraf nazren uThao

dekh lo phaili hui bikhri hui hum ko

ki hum to zindagi hain