hansi

laḌke hañste haiñ

aur chal paḌte haiñ

Toliyoñ kī shakl meñ

unheñ apne ghar kī taraf aatā dekh kar

nā-bāliġh laḌkiyāñ rone lagtī haiñ

unheñ rotā dekh kar

laḌkoñ par kuchh asar nahīñ hotā

vo hañste hue chalte rahte haiñ

apne hāthoñ meñ

pistauloñ ko ghumāte hue

apnī bandūqoñ kī nokoñ se

dukānoñ ke shuter bajāte

apne apne hathiyār lahrāte

vo baḌe faḳhr se

hañste rahte haiñ

vo jahāñ se guzarte haiñ

logoñ ke chehre

ḳhauf aur dahshat se

ġhair ma.amūlī had tak phail jaate haiñ

vo jahāñ Thaharte haiñ

maut un ke saath

thoḌī der ke liye vahīñ Thahar jaatī hai

maut ko itnā qarīb dekh kar bhī

un kī hañsī band nahīñ hotī

un ke qadam nahīñ laḌkhaḌāte

vo hañste hī rahte haiñ

har samt meñ be-shumār

goliyāñ chalāte

har dīvār har darvāze par

bahut se sūrāḳh karte

siyāh saḌak par insānī ḳhuun se

surḳh nishān Dālte

apne pīchhe tar-o-tāza phūloñ se bharī

qabroñ kī jannat

apne pīchhe

lā-ta.adād āñsuoñ se bharā

shaffāf dariyā chhoḌte

hañste hue

vo guzar jaate haiñ

kabhī un meñ se ek aadh laḌkā

apne kisī sāthī kī ġhalatī

yā muḳhālif samt se aane vaalī goliyoñ kī vaj.h se

ruktā hai

aur hañste hue

ek kaar ke pīchhe chhupne kī koshish meñ

zamīn par gir jaatā hai

hamesha ke liye

har taraf ḳhāmoshī ho jaane par

baaqī laḌke

is ke ThanDe be-jān jism ke chāroñ taraf

jam.a ho jaate haiñ

vo dekhte haiñ

laḌke ke chehre par

maut kī hañsī

ab tak maujūd hai

laDke hanste hain

aur chal paDte hain

Toliyon ki shakl mein

unhen apne ghar ki taraf aata dekh kar

na-baaligh laDkiyan rone lagti hain

unhen rota dekh kar

laDkon par kuchh asar nahin hota

wo hanste hue chalte rahte hain

apne hathon mein

pistaulon ko ghumate hue

apni banduqon ki nokon se

dukanon ke shuter bajate

apne apne hathiyar lahraate

wo baDe faKHr se

hanste rahte hain

wo jahan se guzarte hain

logon ke chehre

KHauf aur dahshat se

ghair mamuli had tak phail jate hain

wo jahan Thaharte hain

maut un ke sath

thoDi der ke liye wahin Thahar jati hai

maut ko itna qarib dekh kar bhi

un ki hansi band nahin hoti

un ke qadam nahin laDkhaDate

wo hanste hi rahte hain

har samt mein be-shumar

goliyan chalate

har diwar har darwaze par

bahut se suraKH karte

siyah saDak par insani KHun se

surKH nishan Dalte

apne pichhe tar-o-taza phulon se bhari

qabron ki jannat

apne pichhe

la-tadad aansuon se bhara

shaffaf dariya chhoDte

hanste hue

wo guzar jate hain

kabhi un mein se ek aadh laDka

apne kisi sathi ki ghalati

ya muKHalif samt se aane wali goliyon ki wajh se

rukta hai

aur hanste hue

ek kar ke pichhe chhupne ki koshish mein

zamin par gir jata hai

hamesha ke liye

har taraf KHamoshi ho jaane par

baqi laDke

is ke ThanDe be-jaan jism ke chaaron taraf

jama ho jate hain

wo dekhte hain

laDke ke chehre par

maut ki hansi

ab tak maujud hai