haqaeq

dil hai pahlū meñ to paidā sheva-e-turkāna kar

jaur haft-aflāk ke hote raheñ parvā na kar

ġham ko ḳhud aakar bahā jā.egī mauj-e-surūr

dekhtā kyā hai uTh aur fikr-e-mai-o-paimāna kar

da.avā-e-ulfat jatā kar muft meñ rusvā na ho

daar par chaḌhne se pahle rāz-e-ishq afshā na kar

zarf-e-naisāñ chāhtī hai qulzum-āshāmī tirī

barg-e-gul kī tarah shabnam ke liye tarsā na kar

kaam ibrāhīmiyoñ kā hai ki kheleñ aag se

kuud paḌ sho.aloñ meñ ḳhauf anjām kā aslā na kar

le ke naam allāh kā tūfāñ meñ kashtī Daal de

ḳhauf-e-be-pāyānī-e-dariyā-e-mauj-afzā na kar

ḳhud amal terā hai sūrat-gar tirī taqdīr kā

shikva karnā ho to apnā kar muqaddar kā na kar

sāya-e-shamshīr meñ poshīda jannat hai magar

nā-kasoñ ke sāmne is bhed kā charchā na kar

dil hai pahlu mein to paida shewa-e-turkana kar

jaur haft-aflak ke hote rahen parwa na kar

gham ko KHud aakar baha jaegi mauj-e-surur

dekhta kya hai uTh aur fikr-e-mai-o-paimana kar

dawa-e-ulfat jata kar muft mein ruswa na ho

dar par chaDhne se pahle raaz-e-ishq afsha na kar

zarf-e-naisan chahti hai qulzum-ashami teri

barg-e-gul ki tarah shabnam ke liye tarsa na kar

kaam ibrahimiyon ka hai ki khelen aag se

kud paD shoalon mein KHauf anjam ka asla na kar

le ke nam allah ka tufan mein kashti Dal de

KHauf-e-be-payani-e-dariya-e-mauj-afza na kar

KHud amal tera hai surat-gar teri taqdir ka

shikwa karna ho to apna kar muqaddar ka na kar

saya-e-shamshir mein poshida jannat hai magar

na-kason ke samne is bhed ka charcha na kar