har raat ka KHwab

maiñ hamesha kī tarah tanhā.ī kī bāhoñ meñ bāheñ Daal kar

raat bhī sāhil pe thā mahv-e-ḳhirām

raat bhī apne hī saa.e kī nigāhoñ meñ nigāheñ Daal kar

maiñ ḳhud apne-āp se thā ham-kalām

dam-ba-dam dāman-kashāñ thā raat bhī gahre samundar kā fusūñ

khiñch rahī thiiñ raat kī niilī rageñ

raat bhī jab baḌh rahā thā tez vahshat-ḳhez maujoñ kā junūñ

merā saaya kah rahā thā aa chaleñ

nā-gahāñ TuuTā dhueñ kā ābshār

dekhte hī dekhte bijlī girī ik zor kā kauñdā huā

meñ bhañvar jaise safīne par savār

bādbāñ jis kī havā.eñ bijliyāñ mastūl tūfāñ nāḳhudā

tak rahā thā har taraf dīvāna-vār

raat bhī maiñ ḳhauf kī shiddat meñ apne saa.e se lipTā huā

raat bhī palkoñ pe raushan thā lahū

raat bhī jārī-o-sārī thā ragoñ meñ bijliyoñ kā irti.āsh

raat bhī hairāñ thī chashm-e-justujū

raat bhī dekhī hai maiñ ne apne ik ham-shakl kī maujoñ meñ laash

us kī pathrā.ī huī āñkhoñ se duur

raat bhī maiñ buz-dilī se bhaag aayā us ko tanhā chhoḌ kar

bār-e-shab se aaj bhī shāne haiñ chuur

aaj bhī uTThā huuñ jaise ruuh kā tārīk gherā toḌ kar

main hamesha ki tarah tanhai ki bahon mein bahen Dal kar

raat bhi sahil pe tha mahw-e-KHiram

raat bhi apne hi sae ki nigahon mein nigahen Dal kar

main KHud apne-ap se tha ham-kalam

dam-ba-dam daman-kashan tha raat bhi gahre samundar ka fusun

khinch rahi thin raat ki nili ragen

raat bhi jab baDh raha tha tez wahshat-KHez maujon ka junun

mera saya kah raha tha aa chalen

na-gahan TuTa dhuen ka aabshaar

dekhte hi dekhte bijli giri ek zor ka kaunda hua

mein bhanwar jaise safine par sawar

baadban jis ki hawaen bijliyan mastul tufan naKHuda

tak raha tha har taraf diwana-war

raat bhi main KHauf ki shiddat mein apne sae se lipTa hua

raat bhi palkon pe raushan tha lahu

raat bhi jari-o-sari tha ragon mein bijliyon ka irtiash

raat bhi hairan thi chashm-e-justuju

raat bhi dekhi hai main ne apne ek ham-shakl ki maujon mein lash

us ki pathrai hui aankhon se dur

raat bhi main buz-dili se bhag aaya us ko tanha chhoD kar

bar-e-shab se aaj bhi shane hain chur

aaj bhi uTTha hun jaise ruh ka tarik ghera toD kar