har sal in subhon

har saal in sub.hoñ ke safar meñ ik din aisā bhī aatā hai

jab pal bhar ko zarā sarak jaate haiñ merī khiḌkī ke aage se ghūmte ghūmte

saat karoḌ kurre aur sūraj ke piile phūloñ vaalī phulvāḌī se ik pattī uḌ kar

mere mez par aa girtī hai

in jumbā jahtoñ meñ sākin

tab itne meñ saat karoḌ kurre phir pātāloñ se ubhar kar aur khiḌkī ke sāmne aa kar

dhuup kī is chaukor sī TukḌī ko gahnā dete haiñ

aane vaale baras tak

is kamre tak vāpas aane meñ mujh ko ik din us ko ek baras lagtā hai

aaj bhī ik aisā hī din hai

abhī abhī ik aaḌī tirchhī raushan sīḌhī sad-hā zāviyoñ kī pal bhar ko jhuk aa.ī thī

us khiḌkī tak

ek laraztī huī maujūdgī is sīḌhī se abhī abhī is kamre meñ utrī thī

baras baras hone ke partav kī ye ek parat is mez par dam bhar yuuñ Dhaltī hai

jaane bāhar is honī ke hast meñ kyā kyā kuchh hai

aaj ye apne paañv to pātāloñ meñ gaḌe hue haiñ

har sal in subhon ke safar mein ek din aisa bhi aata hai

jab pal bhar ko zara sarak jate hain meri khiDki ke aage se ghumte ghumte

sat karoD kurre aur suraj ke pile phulon wali phulwaDi se ek patti uD kar

mere mez par aa girti hai

in jumba jahton mein sakin

tab itne mein sat karoD kurre phir patalon se ubhar kar aur khiDki ke samne aa kar

dhup ki is chaukor si TukDi ko gahna dete hain

aane wale baras tak

is kamre tak wapas aane mein mujh ko ek din us ko ek baras lagta hai

aaj bhi ek aisa hi din hai

abhi abhi ek aaDi tirchhi raushan siDhi sad-ha zawiyon ki pal bhar ko jhuk aai thi

us khiDki tak

ek larazti hui maujudgi is siDhi se abhi abhi is kamre mein utri thi

baras baras hone ke partaw ki ye ek parat is mez par dam bhar yun Dhalti hai

jaane bahar is honi ke hast mein kya kya kuchh hai

aaj ye apne panw to patalon mein gaDe hue hain