harf-e-na-rasa

khulī kitāb ke hurūf

sharmgīñ nigāh se

dekhte haiñ yuuñ mujhe

ki jaise ye na.e paḌosī jaane kab se

merī uljhanoñ ke rāzdār haiñ

har ek lafz dard ban ke ḳhalvatoñ meñ gūñjtā hai raat bhar

ye ḳhat bhī ajnabī nahīñ

ye harf bhī nahīñ

ki un kī har nigah meñ har adā meñ

bolte badan kī har sadā meñ

mere ang ang ke liye karb kī pukār hai

samā.atoñ basāratoñ kī bebasī ke bāvajūd

un kī dukh bharī fuġhāñ bhī sun rahā huuñ

un ke zaḳhm dekhtā huuñ

lekin aah

kis qadar aziim hai ye alamiya

ki maiñ unheñ paḌhūñ to nā-rasā.ī kā ġhubār

āñkhoñ meñ utaar deñ

tamām sa.i-e-qurb

dūriyoñ kī zad pe vaar deñ

junūn-e-sho.ala-numū ko zahr-e-intizār deñ

khuli kitab ke huruf

sharmgin nigah se

dekhte hain yun mujhe

ki jaise ye nae paDosi jaane kab se

meri uljhanon ke raazdar hain

har ek lafz dard ban ke KHalwaton mein gunjta hai raat bhar

ye KHat bhi ajnabi nahin

ye harf bhi nahin

ki un ki har nigah mein har ada mein

bolte badan ki har sada mein

mere ang ang ke liye karb ki pukar hai

samaaton basaraton ki bebasi ke bawajud

un ki dukh bhari fughan bhi sun raha hun

un ke zaKHm dekhta hun

lekin aah

kis qadar azim hai ye alamiya

ki main unhen paDhun to na-rasai ka ghubar

aankhon mein utar den

tamam sai-e-qurb

duriyon ki zad pe war den

junun-e-shoala-numu ko zahr-e-intizar den