hashr ki subh daraKHshan ho maqam-e-mahmud

raat dāḌhī ke añdhere se takalluf barte

arsh ke sāmne rusvā.ī kī gardan na uThe

izn-e-sajda pe kamar taḳhta na ho jaa.e kahīñ

khokhle lafzoñ meñ lohā to nahīñ bhar sakte

saikaḌoñ saal kī tablīġh ke chālīs samar

kashtī ban jaa.e to tannūr se paanī uble

sālhā-sāl se ārām natīja matlūb

tīn-sau-sāTh sanam ḳhāna-e-ka.aba se chale

reg-zāroñ meñ ġhubār aur khajūrī saa.e

uuñT kī aañkh meñ tash.hīr huā dard-e-safar

koī 'hiñda' se kahe daañt kahāñ haiñ tere

fat.h-e-makka se magar log hidāyat paa.eñ

ḳhuun jam jaa.e jo nālain meñ chalte chalte

arsh kī aañkh se rahmat kā samundar uble

jibra.īl apnī hai.at meñ haiñ numā.ish-manzar

paañv pātāl meñ sar charḳh se Takrā.e kahīñ

par jo khole to har ik samt pe parde laTkeñ

aur jaltā huā sūraj abhī kho jaa.e kahīñ

qāfila aayā hai 'bū-bakr' se mansūb magar

maal taqsīm huā dāman-e-hājat-mañdañ

nuur kañdhe pe uThā.e shab-e-hijrat ke safīr

ġhaar meñ saath rahe paas hī paivand hue

masjid-e-nabvī meñ ambār-e-ġhanīmat raushan

log rote hue nikle haiñ pareshāñ-manzar

raushnī pahuñchī 'abū-jahl' kī dīvāroñ tak

ghar kī tārīkī meñ rasta na bane bīnā.ī

peḌ ke saa.e kī pahchān yahūdī rāhib

ruk gayā āb-e-ravāñ beva ke darvāze par

dast-e-zohrā meñ nishānāt ayaañ chakkī se

ilm ke baab 'alī' umr meñ sab se chhoTe

chāñd kā naam tire chāk-garebānoñ meñ

mubtadī DhūñDte haiñ masjid-e-aqsā meñ imaam

sidrat-ul-muntahā jibrīl ijāzat māñge

kaun thā kis ne pukārā ki chale bhī aao

kaun maujūd thā pahle se vahāñ kaun gayā

kaun suntā thā vahāñ kis ne pukārā kis ko

kis kī āvāz kī tanvīr se aalim chamke

sar-bulandī thī muqaddar meñ qalam se pahle

bakriyāñ kaun 'halīma' kī charāne jaa.e

'āmina' batn se iz.hār hai aadam kā uruuj

mujtam.a kis ne kiyā logoñ ko parbat ke qarīb

kis ne lalkārā zalālat ko musalsal tanhā

jau kī roTī kabhī mil jaa.e kabhī fāqa-kashī

bhuuk se peT pe patthar kabhī bāñdhe kis ne

tīn-sau-terah kī ta.adād hai kis gintī meñ

fikr pe dā.era-kun ḳhandaqeñ khodī jaa.eñ

duur kī dhuup meñ hai faisla-kun rah-e-tabūk

'hañzala' sāmne aa jaa.eñ jo chhaT jaa.e ġhubār

maiñ ne pahuñchā diyā tum tak jo mujhe pahuñchā thā

maiñ ne pahuñchā diyā tum tak jo mujhe pahuñchā thā

maiñ ne pahuñchā diyā tum tak jo mujhe pahuñchā thā

koī pardesī hai ḳheme pe pareshāñ-surat

aur 'fārūq' chale biivī ko ham-rāh liye

fāsle toḌ kar āvāz ke saa.e phaile

hākim-e-vaqt kā kurtā ka.ī paivand lagā

bakriyāñ jis se sambhālī nahīñ jātīñ thiiñ kabhī

nisf duniyā pe ḳhilāfat ke alam lahrā.e

yaad hai sāhibo ḳhaibar ko ukhāḌā kis ne

kis kī talvār thī ā.īna zamāne ke liye

kis ne zarḳhez shujā.at ke sitāre bo.e

jaan dī jāvedāñ lamhāt tilāvat mashġhūl

ḳhuun ke dhabbe haiñ qur.ān pe tābinda nazar

kaun rotā thā musalle pe hamārī ḳhātir

pair varma ga.e kis ke shab-e-sajda-o-qiyām

do mahīnoñ meñ makānoñ se dhuāñ tak na uThe

fikr-e-ummat ki har ik lamha lahū meñ karvaT

jism raushan thā chaTā.ī ke nishāñ bhī raushan

gāliyāñ khāte phireñ makka ke bāzāroñ meñ

aur tanhā kabhī taa.ef se nikāle jaa.eñ

marhabā shukr kā Thahrāo bahishtī zevar

marhabā sabr kā irfān ki merāj-e-hayāt

nuur majsūm huā gumbad-e-ḳhazrā markūz

hashr kī sub.h daraḳhshāñ ho maqām-e-mahmūd

haath raushan rahe kausar se qarābat manzar

ḳhuun ab sard huā jaatā hai shiryānoñ meñ

aur baḌhtī huī ta.adād bharosā toḌe

nafs dauḌātā hai phir jānib-e-shahvat ghoḌe

lazzat-e-shai meñ haiñ ma.adūm charāġhoñ kī laveñ

raushnī apne paḌosī ko bhī pahuñchā na sake

ruuh ab sho.alagī māñge hai har ik zarre se

koī ilyās kī bātoñ pe zarā kaan dhare

koī yūsuf se shahādat ke ma.ānī pūchhe

koī taqsīm kare vaqt ko masjid masjid

koī bai.at to kare dast-e-zakariyā hāzir

markaz-e-ishq pe pahuñcho to ho in.ām-e-nazar

ek ik lamha ke chehre se ayaañ izn-e-safar

gumrahī qil.oñ meñ mahfūz rahegī kab tak

sar uThā.egī havā bādbāñ khul jā.eñge

band darvāzoñ pe dastak kī sadā gūñjegī

dhuup dahlīz pe pahuñchā.egī mehmānoñ ko

sā.ebāñ sar pe abābīl liye saath chale

talḳh tahzīb ke sahrā meñ azaañ lahrā.e

guuñj uTThegā haram nara-e-labbaik, zamīñ

tere qadmoñ meñ ugal degī ḳhazāne apne

terī taqlīd meñ maġhrib kī baqā poshīda

terī tazlīl meñ jo haath uThe kaT jaa.e

terī nusrat ke liye āsmāñ koshish maqsūd

silsile tere baneñ zeb-e-jahān-e-fānī

nuur majsūm huā gumbad-e-ḳhazra markūz

hashr kī sub.h daraḳhshāñ ho maqām-e-mahmūd

raat daDhi ke andhere se takalluf barte

arsh ke samne ruswai ki gardan na uThe

izn-e-sajda pe kamar taKHta na ho jae kahin

khokhle lafzon mein loha to nahin bhar sakte

saikaDon sal ki tabligh ke chaalis samar

kashti ban jae to tannur se pani uble

salha-sal se aaram natija matlub

tin-sau-saTh sanam KHana-e-kaba se chale

reg-zaron mein ghubar aur khajuri sae

unT ki aankh mein tashhir hua dard-e-safar

koi 'hinda' se kahe dant kahan hain tere

fath-e-makka se magar log hidayat paen

KHun jam jae jo nalain mein chalte chalte

arsh ki aankh se rahmat ka samundar uble

jibrail apni haiat mein hain numaish-manzar

panw patal mein sar charKH se Takrae kahin

par jo khole to har ek samt pe parde laTken

aur jalta hua suraj abhi kho jae kahin

qafila aaya hai 'bu-bakr' se mansub magar

mal taqsim hua daman-e-hajat-mandan

nur kandhe pe uThae shab-e-hijrat ke safir

ghaar mein sath rahe pas hi paiwand hue

masjid-e-nabwi mein ambar-e-ghanimat raushan

log rote hue nikle hain pareshan-manzar

raushni pahunchi 'abu-jahl' ki diwaron tak

ghar ki tariki mein rasta na bane binai

peD ke sae ki pahchan yahudi rahib

ruk gaya aab-e-rawan bewa ke darwaze par

dast-e-zohra mein nishanat ayan chakki se

ilm ke bab 'ali' umr mein sab se chhoTe

chand ka nam tere chaak-garebanon mein

mubtadi DhunDte hain masjid-e-aqsa mein imam

sidrat-ul-muntaha jibril ijazat mange

kaun tha kis ne pukara ki chale bhi aao

kaun maujud tha pahle se wahan kaun gaya

kaun sunta tha wahan kis ne pukara kis ko

kis ki aawaz ki tanwir se aalim chamke

sar-bulandi thi muqaddar mein qalam se pahle

bakriyan kaun 'halima' ki charane jae

'amina' batn se izhaar hai aadam ka uruj

mujtama kis ne kiya logon ko parbat ke qarib

kis ne lalkara zalalat ko musalsal tanha

jau ki roTi kabhi mil jae kabhi faqa-kashi

bhuk se peT pe patthar kabhi bandhe kis ne

tin-sau-terah ki tadad hai kis ginti mein

fikr pe daera-kun KHandaqen khodi jaen

dur ki dhup mein hai faisla-kun rah-e-tabuk

'hanzala' samne aa jaen jo chhaT jae ghubar

main ne pahuncha diya tum tak jo mujhe pahuncha tha

main ne pahuncha diya tum tak jo mujhe pahuncha tha

main ne pahuncha diya tum tak jo mujhe pahuncha tha

koi pardesi hai KHeme pe pareshan-surat

aur 'faruq' chale biwi ko ham-rah liye

fasle toD kar aawaz ke sae phaile

hakim-e-waqt ka kurta kai paiwand laga

bakriyan jis se sambhaali nahin jatin thin kabhi

nisf duniya pe KHilafat ke alam lahrae

yaad hai sahibo KHaibar ko ukhaDa kis ne

kis ki talwar thi aaina zamane ke liye

kis ne zarKHez shujaat ke sitare boe

jaan di jawedan lamhat tilawat mashghul

KHun ke dhabbe hain quran pe tabinda nazar

kaun rota tha musalle pe hamari KHatir

pair warma gae kis ke shab-e-sajda-o-qiyam

do mahinon mein makanon se dhuan tak na uThe

fikr-e-ummat ki har ek lamha lahu mein karwaT

jism raushan tha chaTai ke nishan bhi raushan

galiyan khate phiren makka ke bazaron mein

aur tanha kabhi taef se nikale jaen

marhaba shukr ka Thahrao bahishti zewar

marhaba sabr ka irfan ki meraj-e-hayat

nur majsum hua gumbad-e-KHazra markuz

hashr ki subh daraKHshan ho maqam-e-mahmud

hath raushan rahe kausar se qarabat manzar

KHun ab sard hua jata hai shiryanon mein

aur baDhti hui tadad bharosa toDe

nafs dauData hai phir jaanib-e-shahwat ghoDe

lazzat-e-shai mein hain madum charaghon ki lawen

raushni apne paDosi ko bhi pahuncha na sake

ruh ab shoalagi mange hai har ek zarre se

koi ilyas ki baaton pe zara kan dhare

koi yusuf se shahadat ke maani puchhe

koi taqsim kare waqt ko masjid masjid

koi baiat to kare dast-e-zakariya hazir

markaz-e-ishq pe pahuncho to ho inam-e-nazar

ek ek lamha ke chehre se ayan izn-e-safar

gumrahi qilon mein mahfuz rahegi kab tak

sar uThaegi hawa baadban khul jaenge

band darwazon pe dastak ki sada gunjegi

dhup dahliz pe pahunchaegi mehmanon ko

saeban sar pe ababil liye sath chale

talKH tahzib ke sahra mein azan lahrae

gunj uTThega haram nara-e-labbaik, zamin

tere qadmon mein ugal degi KHazane apne

teri taqlid mein maghrib ki baqa poshida

teri tazlil mein jo hath uThe kaT jae

teri nusrat ke liye aasman koshish maqsud

silsile tere banen zeb-e-jahan-e-fani

nur majsum hua gumbad-e-KHazra markuz

hashr ki subh daraKHshan ho maqam-e-mahmud