hasrat

kabhī mile to maiñ pūchhūñ us se

kyā milā hai kinārā kar ke

vafā kī qīmat vasūl huī

yā

bichhaḌ ke mujh se tum ḳhush rahoge

vo ik duā thī qubūl huī

tumhāre chehre se lag rahā hai

ki aisā hargiz nahīñ huā hai

tumhāre ḳhvāboñ kī kitnī lāsheñ

tumhārī āñkhoñ se gir rahī haiñ

tumhāre hoñToñ pe raqs kartī

vo muskurāhaT bhī mar ga.ī hai

kahā thā kis ne

kahā thā kis ne

ki mere hāthoñ kī in lakīroñ se

naam apnā churā ke bhāgo

jo merī āñkhoñ meñ naqsh kab kā

vo aks apnā uThā ke niklo

koī milā phir

koī milā phir

jo tumheñ vafā kī jazā.eñ detā

tum ḳhush rahoge duā.eñ detā

tumhāre pīchhe sadā.eñ detā

nahīñ milā nā

to āḳhir vahī huā nā

jo naam apnā churā ga.e the

vo bhī āḳhir gañvā diyā nā

jo aks āñkhoñ se le ga.e the

vo hasratoñ meñ chhupā diyā nā

jo dil meñ mere maqām terā thā

vo bhī āḳhir girā diyā nā

kabhī mile to maiñ pūchhūñ us se

kyā milā ye kinārā kar ke

kabhi mile to main puchhun us se

kya mila hai kinara kar ke

wafa ki qimat wasul hui

ya

bichhaD ke mujh se tum KHush rahoge

wo ek dua thi qubul hui

tumhaare chehre se lag raha hai

ki aisa hargiz nahin hua hai

tumhaare KHwabon ki kitni lashen

tumhaari aankhon se gir rahi hain

tumhaare honTon pe raqs karti

wo muskurahaT bhi mar gai hai

kaha tha kis ne

kaha tha kis ne

ki mere hathon ki in lakiron se

nam apna chura ke bhago

jo meri aankhon mein naqsh kab ka

wo aks apna uTha ke niklo

koi mila phir

koi mila phir

jo tumhein wafa ki jazaen deta

tum KHush rahoge duaen deta

tumhaare pichhe sadaen deta

nahin mila na

to aaKHir wahi hua na

jo nam apna chura gae the

wo bhi aaKHir ganwa diya na

jo aks aankhon se le gae the

wo hasraton mein chhupa diya na

jo dil mein mere maqam tera tha

wo bhi aaKHir gira diya na

kabhi mile to main puchhun us se

kya mila ye kinara kar ke