mehman

aaj kī raat aur baaqī hai

kal to jaanā hī hai safar pe mujhe

zindagī muntazir hai muñh phāḌe

zindagī ḳhaak o ḳhuun meñ luthḌī

aañkh meñ sho.ala-hā-e-tund liye

do ghaḌī ḳhud ko shādmāñ kar leñ

aaj kī raat aur baaqī hai

chalne hī ko hai ik sumūm abhī

raqs-farmā hai rūh-e-barbādī

barbariyat ke kārvānoñ se

zalzale meñ hai sīna-e-gītī

zauq-e-pinhāñ ko kāmrāñ kar leñ

aaj kī raat aur baaqī hai

ek paimāna-e-mai-e-sarjosh

lutf-e-guftār garmi-e-āġhosh

bose is darja ātishīñ bose

phūñk Dāleñ jo merī kisht-e-hosh

ruuh yaḳh-basta hai tapāñ kar leñ

aaj kī raat aur baaqī hai

ek do aur sāġhar-e-sarshār

phir to honā hī hai mujhe hoshiyār

chheḌnā hī hai sāz-e-zīst mujhe

aag barsā.eñge lab-e-guftār

kuchh tabī.at to ham ravāñ kar leñ

aaj kī raat aur baaqī hai

phir kahāñ ye hasīñ suhānī raat

ye farāġhat ye kaif ke lamhāt

kuchh to āsūdgi-e-zauq-e-nihāñ

kuchh to taskīn-e-shorish-e-jazbāt

aaj kī raat jāvedāñ kar leñ

aaj kī raat aur aaj kī raat

aaj ki raat aur baqi hai

kal to jaana hi hai safar pe mujhe

zindagi muntazir hai munh phaDe

zindagi KHak o KHun mein luthDi

aankh mein shoala-ha-e-tund liye

do ghaDi KHud ko shadman kar len

aaj ki raat aur baqi hai

chalne hi ko hai ek sumum abhi

raqs-farma hai ruh-e-barbaadi

barbariyat ke karwanon se

zalzale mein hai sina-e-giti

zauq-e-pinhan ko kaamran kar len

aaj ki raat aur baqi hai

ek paimana-e-mai-e-sarjosh

lutf-e-guftar garmi-e-aghosh

bose is darja aatishin bose

phunk Dalen jo meri kisht-e-hosh

ruh yaKH-basta hai tapan kar len

aaj ki raat aur baqi hai

ek do aur saghar-e-sarshaar

phir to hona hi hai mujhe hoshiyar

chheDna hi hai saz-e-zist mujhe

aag barsaenge lab-e-guftar

kuchh tabiat to hum rawan kar len

aaj ki raat aur baqi hai

phir kahan ye hasin suhani raat

ye faraghat ye kaif ke lamhat

kuchh to aasudgi-e-zauq-e-nihan

kuchh to taskin-e-shorish-e-jazbaat

aaj ki raat jawedan kar len

aaj ki raat aur aaj ki raat