hawa aur suraj ka muqabla

ik musāfir apnī dhun meñ thā ravāñ

us ko in donoñ ne taakā nā-gahāñ

ho ga.e aapas meñ tai qaul-o-qarār

jo labāda le musāfir kā utaar

bas usī ke naam kā Dañkā baje

sar pe dastār-e-fazīlat vo saje

phir to āñdhī ban ke chal niklī havā

aisī biphrī kar diyā tūfāñ bapā

ūñche ūñche peḌ tharrāne lage

jhok se jhokoñ kī charrāne lage

naunihāloñ kī kamar bal khā ga.ī

phuul pattoñ par qayāmat aa ga.ī

kaañp uThe us dasht ke kul vahsh o tair

māñgte the apne apne dam kī ḳhair

ho gayā dāmān-e-sahrā gard-bard

ghir gayā aafat meñ vo sahrā-navard

chāhtī thī luuñ libāde ko uchak

mudda.ī ko duuñ sar-e-maidān zak

jab havā letī thī chakkar meñ lapeT

baiTh jaatā thā vo dāman ko sameT

sīna-zori se na chorī se Darī

kar sakī lekin na kuchh ġhārat-garī

bāñdh lī kas kar musāfir ne kamar

tā havā kā ho na kapḌoñ meñ guzar

thak ga.ī āḳhir na us kā bas chalā

Tal ga.ī sar se musāfir ke balā

ab thamā jhakkaḌ to niklā āftāb

rū-e-nūrānī se sarkā.ī naqāb

tamkanat chehre se us ke āshkār

chaal meñ ik burd-bārī aur vaqār

vo havā kī sī na thī yaañ dhūm-dhām

kar rahā thā chupke chupke apnā kaam

dhīmī dhīmī kirneñ chamkāne lagā

rafta rafta sab ko garmāne lagā

us musāfir ko pasīna aa gayā

khol Daale band jī ghabrā gayā

aur aage ko baḌhā to dhuup se

tan-badan meñ kuchh patañge se lage

ab libāde ko liyā kāñdhe pe Daal

badlī yuuñ naubat ba naubat chāl-Dhāl

jab chaḌhā ḳhurshīd samt-u-rrās par

baiTh kar saa.e meñ phir to ghaas par

duur pheñkā us libāde ko utaar

vāh-re sūraj liyā maidān maar

tezī-o-tundī ke girvīda haiñ sab

kāmyābī kā magar hai aur Dhab

us kā gur hai narmī o āhistagī

sar-kashī kī rag usī se hai dabī

ek musafir apni dhun mein tha rawan

us ko in donon ne taka na-gahan

ho gae aapas mein tai qaul-o-qarar

jo labaada le musafir ka utar

bas usi ke nam ka Danka baje

sar pe dastar-e-fazilat wo saje

phir to aandhi ban ke chal nikli hawa

aisi biphri kar diya tufan bapa

unche unche peD tharrane lage

jhok se jhokon ki charrane lage

naunihaalon ki kamar bal kha gai

phul patton par qayamat aa gai

kanp uThe us dasht ke kul wahsh o tair

mangte the apne apne dam ki KHair

ho gaya daman-e-sahra gard-bard

ghir gaya aafat mein wo sahra-naward

chahti thi lun libaade ko uchak

muddai ko dun sar-e-maidan zak

jab hawa leti thi chakkar mein lapeT

baiTh jata tha wo daman ko sameT

sina-zori se na chori se Dari

kar saki lekin na kuchh ghaarat-gari

bandh li kas kar musafir ne kamar

ta hawa ka ho na kapDon mein guzar

thak gai aaKHir na us ka bas chala

Tal gai sar se musafir ke bala

ab thama jhakkaD to nikla aaftab

ru-e-nurani se sarkai naqab

tamkanat chehre se us ke aashkar

chaal mein ek burd-bari aur waqar

wo hawa ki si na thi yan dhum-dham

kar raha tha chupke chupke apna kaam

dhimi dhimi kirnen chamkane laga

rafta rafta sab ko garmane laga

us musafir ko pasina aa gaya

khol Dale band ji ghabra gaya

aur aage ko baDha to dhup se

tan-badan mein kuchh patange se lage

ab libaade ko liya kandhe pe Dal

badli yun naubat ba naubat chaal-Dhaal

jab chaDha KHurshid samt-u-rras par

baiTh kar sae mein phir to ghas par

dur phenka us libaade ko utar

wah-re suraj liya maidan mar

tezi-o-tundi ke girwida hain sab

kaamyabi ka magar hai aur Dhab

us ka gur hai narmi o aahistagi

sar-kashi ki rag usi se hai dabi