hawa ka nauha

apnī aur 'qayyūm-rāhī' kī maañ kī maut par

sitāre chup haiñ kisī beva maañg kī mānind

bujhā bujhā hai sar-e-shām chāñd kā jhūmar

damaktī rāhoñ ke dhuñdlā ga.e haiñ ā.īne

utar chukā hai ḳhalāoñ meñ raushnī kā nagar

muhīb-o-sarv-o-siyah haath baḌhte jaate haiñ

khiñche hue haiñ fazāoñ meñ ātishīñ ḳhanjar

farishte rote haiñ apne paroñ ko phailā.e

ḳhizāñ ke nāchte pattoñ kī mātamī lai par

havā.eñ detī haiñ dastak mire darīchoñ par

mujhe ye Dar hai na bujh jaa.e terī sham-e-hayāt

chal ab ki chal ke muqaffal kareñ ye darvāze

tujhe na chhīn leñ mujh se mire raqīb auqāt

na jaane kyā mire allāh hone vaalā hai

muhīb saaya añdhere meñ thartharātā hai

baḌhā ke haath ye darvāza kis ne khol diyā

ye terī samt dabe paañv kaun aatā hai

ye kis ne bāñhoñ meñ ghabrā ke bhar liyā tujh ko

ki jaise dev ho shahzāde ke fasānoñ kā

fazā pe phūñk gayā paḌh ke maut kā afsūñ

har ek shai hai yahāñ terī tarah marg-āsā

phir is tarah se tirā paikar-e-nahīf uḌā

ki jaise gard koī āñdhiyoñ ke saath chale

bhaTaktī rah ga.ī añdhiyāroñ meñ mirī āvāz

charāġh-e-qabr kī mānind maiñ ne haath male

har ek shahr meñ tanhā galī galī tanhā

maiñ phir rahā huuñ tire ġham kī laash uThā.e hue

ḳhizāñ ke vaqt koī jaise barg-e-āvāra

ravish ravish pe ḳhud apne hī madfanoñ ko gine

apni aur 'qayyum-rahi' ki man ki maut par

sitare chup hain kisi bewa mang ki manind

bujha bujha hai sar-e-sham chand ka jhumar

damakti rahon ke dhundla gae hain aaine

utar chuka hai KHalaon mein raushni ka nagar

muhib-o-sarw-o-siyah hath baDhte jate hain

khinche hue hain fazaon mein aatishin KHanjar

farishte rote hain apne paron ko phailae

KHizan ke nachte patton ki matami lai par

hawaen deti hain dastak mere darichon par

mujhe ye Dar hai na bujh jae teri sham-e-hayat

chal ab ki chal ke muqaffal karen ye darwaze

tujhe na chhin len mujh se mere raqib auqat

na jaane kya mere allah hone wala hai

muhib saya andhere mein thartharaata hai

baDha ke hath ye darwaza kis ne khol diya

ye teri samt dabe panw kaun aata hai

ye kis ne banhon mein ghabra ke bhar liya tujh ko

ki jaise dew ho shahzade ke fasanon ka

faza pe phunk gaya paDh ke maut ka afsun

har ek shai hai yahan teri tarah marg-asa

phir is tarah se tera paikar-e-nahif uDa

ki jaise gard koi aandhiyon ke sath chale

bhaTakti rah gai andhiyaron mein meri aawaz

charagh-e-qabr ki manind main ne hath male

har ek shahr mein tanha gali gali tanha

main phir raha hun tere gham ki lash uThae hue

KHizan ke waqt koi jaise barg-e-awara

rawish rawish pe KHud apne hi madfanon ko gine