hawa se baat karo

havā se baat karo

kaho ki us kī lagā.ī huī girah na khulī

vo dhuul tham na sakī dil ke ruḳh jo uḌtī thī

vo gard uThī nahīñ jo ā.inoñ pe baiThī thī

sabā se baat karo

sabā se baat karo kyā savāl thā us kā

visāl jis kā ta.ayyun na thā judā.ī se

kise pukār gayā

sadā se baat karo

yahī ki jin ko sar-e-dasht-o-bar pukārā gayā

vo sar-kashīda qabā.il kī sar-phirī aulād

kis zamīñ meñ khapī

kis falak kā rizq huī

qazā se baat karo

qazā se baat magar kyā

ki har qabīla-e-dard

ik aise jabr-e-azal-yāb kā havāla hai

jo pahle din kī gavāhī sanad meñ laatā hai

agar javāb se phir ik savāl bantā hai

fanā ke vāste kyoñ bāb-e-harf baaz rahe

bahā jahān kī lā hai to lā se baat karo

ibtidā se baat karo

hawa se baat karo

kaho ki us ki lagai hui girah na khuli

wo dhul tham na saki dil ke ruKH jo uDti thi

wo gard uThi nahin jo aainon pe baiThi thi

saba se baat karo

saba se baat karo kya sawal tha us ka

visal jis ka tayyun na tha judai se

kise pukar gaya

sada se baat karo

yahi ki jin ko sar-e-dasht-o-bar pukara gaya

wo sar-kashida qabail ki sar-phiri aulad

kis zamin mein khapi

kis falak ka rizq hui

qaza se baat karo

qaza se baat magar kya

ki har qabila-e-dard

ek aise jabr-e-azal-yab ka hawala hai

jo pahle din ki gawahi sanad mein lata hai

agar jawab se phir ek sawal banta hai

fana ke waste kyon bab-e-harf baz rahe

baha jahan ki la hai to la se baat karo

ibtida se baat karo