hayula

mah o saal ke taane baane ko

zarrīñ shuāoñ kī gul-kāriyāñ

merī nazroñ ne baḳhshī haiñ

āfāq ke ḳhadd-o-ḳhāl-e-bahār-āfrīñ meñ

mire ḳhuuñ kī sauġhāt shāmil hai

har vus.at-e-be-karāñ meñ

mirī dhaḌkaneñ gūñjtī haiñ

har ik lamha koī na koī bagūla uThā

aur mire naqsh-e-pā ko miTāne kī dhun meñ chalā

lekin āvāz-e-pā kī garajtī ghaTāoñ se

Takrā ke dasht-e-ḳhamoshī meñ

gum ho gayā

har ik gaam samtoñ ne

sañgīñ shikanjoñ meñ kasne kī

hasrat ko rusvā kiyā

mirī fikr kī lau

sumūm o sabā kī

fusūñ-kāriyoñ se gurezāñ

musalsal farozāñ rahī

ye vo aañch hai jis kī hiddat se

har quvvat-e-sañg-sāzī pighaltī rahī

magar aaj merī anā ke hayūlā meñ

ḳhud-sāḳhta kuchh lakīreñ ubhar aa.ī haiñ

mujh ko Dar hai

kahīñ phailte phailte ye lakīreñ

mirī zaat ko paara paara na kar deñ

anāsir ko phir āshkāra na kar deñ

mah o sal ke tane bane ko

zarrin shuaon ki gul-kariyan

meri nazron ne baKHshi hain

aafaq ke KHadd-o-KHal-e-bahaar-afrin mein

mere KHun ki saughat shamil hai

har wusat-e-be-karan mein

meri dhaDkanen gunjti hain

har ek lamha koi na koi bagula uTha

aur mere naqsh-e-pa ko miTane ki dhun mein chala

lekin aawaz-e-pa ki garajti ghaTaon se

Takra ke dasht-e-KHamoshi mein

gum ho gaya

har ek gam samton ne

sangin shikanjon mein kasne ki

hasrat ko ruswa kiya

meri fikr ki lau

sumum o saba ki

fusun-kariyon se gurezan

musalsal farozan rahi

ye wo aanch hai jis ki hiddat se

har quwwat-e-sang-sazi pighalti rahi

magar aaj meri ana ke hayula mein

KHud-saKHta kuchh lakiren ubhar aai hain

mujh ko Dar hai

kahin phailte phailte ye lakiren

meri zat ko para para na kar den

anasir ko phir aashkara na kar den