hijr ke par bhig jaen

kahāñ tak ḳhema-e-dil meñ chhupā.eñ

apnī aasoñ aur pyāsoñ ko

kahāñ tak ḳhauf ke be-shakl sahrā kī hathelī par

kurede jaa.eñ āñkheñ aur

lakīreñ raushnī kī phir na ban paa.eñ

ham insāñ ho ke bhī saa.e kī ḳhushbū ko taras jaa.eñ

chalo ik dūsre kī ḳhvāhishoñ kī dhuup meñ

jalte hue āñgan kī vīrānī meñ āñkheñ band kar leñ aur baras jaa.eñ

yahāñ tak TuuT kar barseñ ki paanī

vasl kī miTTī meñ ḳhushbū gūñdh le aur phir saroñ tak se guzar jaa.e

zamīn se āsmāñ tak ek hī manzar sañvar jaa.e

hamāre rāstoñ par āsmāñ apnī gavāhī bhej de

ḳhushbū bikhar jaa.e

zamīñ paañv ko chhū le

chāñdnī dil meñ utar jaa.e

havā gar hijr kī sāzish meñ hisse-dār ban kar darmiyāñ aa.e

hijr ke par bhiig jaa.eñ aur

havā paanī meñ mil jaa.e

kahan tak KHema-e-dil mein chhupaen

apni aason aur pyason ko

kahan tak KHauf ke be-shakl sahra ki hatheli par

kurede jaen aankhen aur

lakiren raushni ki phir na ban paen

hum insan ho ke bhi sae ki KHushbu ko taras jaen

chalo ek dusre ki KHwahishon ki dhup mein

jalte hue aangan ki virani mein aankhen band kar len aur baras jaen

yahan tak TuT kar barsen ki pani

wasl ki miTTi mein KHushbu gundh le aur phir saron tak se guzar jae

zamin se aasman tak ek hi manzar sanwar jae

hamare raston par aasman apni gawahi bhej de

KHushbu bikhar jae

zamin panw ko chhu le

chandni dil mein utar jae

hawa gar hijr ki sazish mein hisse-dar ban kar darmiyan aae

hijr ke par bhig jaen aur

hawa pani mein mil jae