hijr

tū paas thā jī ko chain kuchh thā

terā jaanā ki aafat aa.ī

nazroñ se chhupā jo terā chehrā

mere sar par qayāmat aa.ī

baaqī thoḌā sā din thā lekin

merī āñkhoñ meñ thā añdherā

kyūñkar ho sabr mujh se mumkin

dil ko har-dam hai dhyān terā

ai zulm ke aur sitam ke baanī

ai shoḳh jafā-shi.ār ayyār

mujh ko dūbhar hai zindagānī

merī āñkhoñ meñ hai jahāñ taar

ai barq-misāl ai trahdār

ai māh-jabīñ ġhazāl-sīrat

mujh par tār-e-nafas hai ik baar

mujh se kosoñ pare hai rāhat

ghar-bhar sotā hai ek betāb

aaheñ bhar kar taḌap rahā hai

bhūle bhī aañkh ko nahīñ ḳhvāb

zulmat-e-shab kī ajab balā hai

hargiz hargiz mujhe mayassar

aa.ī koī ghaḌī na rāhat

kaisā kaisā rahā huuñ muztar

kitnī kitnī uThā.ī zahmat

dil ko hai saḳht be-qarārī

jiine ke paḌ ga.e haiñ laale

dil kī hālat na ye miTegī

jab tak tū hī na phir sambhāle

mujh ko tanhā.ī go satā.e

tujh ko aish-o-tarab ho maimūñ

mujh par aafat hazār aa.e

tujh se ḳhush-tāla.ī ho maqrūñ

tujh se chhuTnā hai saḳht mushkil

jab tak hai hāfize meñ qudrat

terā terā rahegā ye dil

jab tak na milā.e tujh se qismat

tu pas tha ji ko chain kuchh tha

tera jaana ki aafat aai

nazron se chhupa jo tera chehra

mere sar par qayamat aai

baqi thoDa sa din tha lekin

meri aankhon mein tha andhera

kyunkar ho sabr mujh se mumkin

dil ko har-dam hai dhyan tera

ai zulm ke aur sitam ke bani

ai shoKH jafa-shiar ayyar

mujh ko dubhar hai zindagani

meri aankhon mein hai jahan tar

ai barq-misal ai trahdar

ai mah-jabin ghazal-sirat

mujh par tar-e-nafas hai ek bar

mujh se koson pare hai rahat

ghar-bhar sota hai ek betab

aahen bhar kar taDap raha hai

bhule bhi aankh ko nahin KHwab

zulmat-e-shab ki ajab bala hai

hargiz hargiz mujhe mayassar

aai koi ghaDi na rahat

kaisa kaisa raha hun muztar

kitni kitni uThai zahmat

dil ko hai saKHt be-qarari

jine ke paD gae hain lale

dil ki haalat na ye miTegi

jab tak tu hi na phir sambhaale

mujh ko tanhai go satae

tujh ko aish-o-tarab ho maimun

mujh par aafat hazar aae

tujh se KHush-talai ho maqrun

tujh se chhuTna hai saKHt mushkil

jab tak hai hafize mein qudrat

tera tera rahega ye dil

jab tak na milae tujh se qismat