hijr-zad

mire dukh kā ahd tavīl hai

mirā naam lauh-e-firāq par hai likhā huā

maiñ janm janm se kisī meñ aks-e-mushābahat kī talāsh meñ

phir apne ḳhvāb sarāb saath liye hue

gayā shahar shahar nagar nagar

thiiñ ajiib bastiyāñ raah meñ merī jiit merī shikast kī

kisī dūsre kī sadāqateñ mirī rāhbar marī rāhzan

liye saath saath qadam qadam

kabhī pesh-e-ḳhalvat-ā.īna

kabhī sub.h-o-shām kī ḳhilqatoñ ke julūs meñ

ka.ī zāhiroñ, ka.ī bātinoñ ke badalte ruup meñ munqasim

mujhe kar ga.iiñ

maiñ dhuāñ sā ātish-e-asl kā

uḌā aur ḳhud se bichhaḌ gayā

mujhe har qadam pe lagā ki maiñ

safar-āzmāñ huuñ magar mujhe mirī samt kī bhī ḳhabar nahīñ

maiñ halīf apne ġhanīm kā

huuñ jahāñ bhī rāh-e-ziyāñ meñ huuñ

maiñ ḳhayāl-parvar-e-shauq shahr-e-misāl kā

mujhe har maqām pe yuuñ lagā

ki haqīqatoñ ke sagān-e-kucha-navard mujh pe jhapaT paḌeñge yahīñ kahīñ

mujhe duniyā-dār pachhāḌ deñge mufāhamat kī zamīn par

mire haath bhīge hue sadāoñ ke ḳhauf se

mirī saañs larzī huī havā kī machān par

ye farār thā

ki anā kā sāya-o-sā.ebāñ

liyā jis ne apne bachāv meñ

maiñ ravāñ rahā kisī be-numūd sī raushnī ke bahāv meñ

merā pā-e-shauq-e-sazā kahīñ pe rukā nahīñ

ye nasheb-e-shām hai aur maiñ huuñ ravāñ-davāñ

ye nahīñ ki mujh ko amaañ milegī shab-e-abad ke paḌāv meñ

zarā intizār ki jab vajūd kā kūza-gar

mujhe phir se ḳhaak banā chuke

to ye dekhnā

ki shabīh-e-shaḳhs-e-digar meñ lauT ke ā.ūñgā

usī shahr meñ

mirā naam lauh-e-firāq par hai likhā huā

mire dukh kā ahd tavīl hai

mere dukh ka ahd tawil hai

mera nam lauh-e-firaq par hai likha hua

main janm janm se kisi mein aks-e-mushabahat ki talash mein

phir apne KHwab sarab sath liye hue

gaya shahar shahar nagar nagar

thin ajib bastiyan rah mein meri jit meri shikast ki

kisi dusre ki sadaqaten meri rahbar mari rahzan

liye sath sath qadam qadam

kabhi pesh-e-KHalwat-aina

kabhi subh-o-sham ki KHilqaton ke julus mein

kai zahiron, kai baatinon ke badalte rup mein munqasim

mujhe kar gain

main dhuan sa aatish-e-asl ka

uDa aur KHud se bichhaD gaya

mujhe har qadam pe laga ki main

safar-azman hun magar mujhe meri samt ki bhi KHabar nahin

main halif apne ghanim ka

hun jahan bhi rah-e-ziyan mein hun

main KHayal-parwar-e-shauq shahr-e-misal ka

mujhe har maqam pe yun laga

ki haqiqaton ke sagan-e-kucha-naward mujh pe jhapaT paDenge yahin kahin

mujhe duniya-dar pachhaD denge mufahamat ki zamin par

mere hath bhige hue sadaon ke KHauf se

meri sans larzi hui hawa ki machan par

ye farar tha

ki ana ka saya-o-saeban

liya jis ne apne bachaw mein

main rawan raha kisi be-numud si raushni ke bahaw mein

mera pa-e-shauq-e-saza kahin pe ruka nahin

ye nasheb-e-sham hai aur main hun rawan-dawan

ye nahin ki mujh ko aman milegi shab-e-abad ke paDaw mein

zara intizar ki jab wajud ka kuza-gar

mujhe phir se KHak bana chuke

to ye dekhna

ki shabih-e-shaKHs-e-digar mein lauT ke aaunga

usi shahr mein

mera nam lauh-e-firaq par hai likha hua

mere dukh ka ahd tawil hai