hijrat

vo pattharoñ ke qabīle kī reshmī laḌkī

rivāyatoñ kī fasīloñ meñ ḳhud ko qaid kiye

fareb-e-zāt kī ik ḳhushnumā havelī meñ

akele-pan kī kathā sun rahī thī phūloñ se

aur apne aap ko bahlā.e thī parindoñ se

ki us kī ruuh kī vaadī meñ ik hiran-jazba

qulāñcheñ bhartā huā khā.iyoñ meñ dauḌ gayā

ye pattharoñ ke qabīle kī shāhzādī bhī

har e'timād kī zanjīr toḌ kar niklī

talāsh kartī huī apnā vo hiran-jazba

dukhoñ kī jhiil kināre udaas aa baiThī

vo ḳhaar khīñch rahī thī anā ke talvoñ se

kañval hatheliyāñ chhil kar gulāb hone lagīñ

shikan shikan thā ḳhayāloñ kā pairahan saarā

lahū lahū thā tamannāoñ kā badan saarā

gulābī umr ke mausam meñ ghar se niklī thī

vo pattharoñ ke qabīle kī reshmī laḌkī

mohabbatoñ ke qabīle meñ aan pahuñchī thī

wo pattharon ke qabile ki reshmi laDki

riwayaton ki fasilon mein KHud ko qaid kiye

fareb-e-zat ki ek KHushnuma haweli mein

akele-pan ki katha sun rahi thi phulon se

aur apne aap ko bahlae thi parindon se

ki us ki ruh ki wadi mein ek hiran-jazba

qulanchen bharta hua khaiyon mein dauD gaya

ye pattharon ke qabile ki shahzadi bhi

har e'timad ki zanjir toD kar nikli

talash karti hui apna wo hiran-jazba

dukhon ki jhil kinare udas aa baiThi

wo KHar khinch rahi thi ana ke talwon se

kanwal hatheliyan chhil kar gulab hone lagin

shikan shikan tha KHayalon ka pairahan sara

lahu lahu tha tamannaon ka badan sara

gulabi umr ke mausam mein ghar se nikli thi

wo pattharon ke qabile ki reshmi laDki

mohabbaton ke qabile mein aan pahunchi thi