hikayat-e-gurezan

maiñ ki lā-intihā vaqt kī rahguzar par

sirf ik lamha-e-muḳhtasar

maiñ ki ehsās-o-afkār ke bahr-e-zaḳhḳhār meñ

sirf ik qatra-e-muztarib meñ ki sahrā-e-hastī kī taptī huī ret par

sirf ik zarra sar-nigūñ

maiñ ki ik vus.at kā.enāt-e-hasīñ meñ

sirf ik nuqta-e-be-sukūñ

maiñ vo qatra ki jis meñ samundar kī betābiyāñ maujzan haiñ

vo lamha jo mustaqbil-o-hāl-o-māzī kā aa.ina hai

maiñ vo nuqta ki jo gardish-e-dahr kā āshnā hai

maiñ vo zarra ki sahrā-e-hastī kī tishna-labī

apne dil meñ chhupā.e

maiñ vo ik jism-e-nāzuk ki jo

nasl-e-insāñ ke dard aur isyāñ kā bār-e-garāñ

apne sar par uThā.e

maiñ vo ik chashm-e-pur-shauq jis ke liye vus.at-e-dasht-o-sahrā bhī kam thī

maiñ ne phir chāñd tāroñ par Daalī kamandeñ

āsmānoñ ke vo jagmagāte makīñ

is anokhī jasārat pe sab muskurā.e

maiñ ki ḳhud mahram-e-zauq-e-parvāz

hamrāz sar-e-bulandī

chāñd tāroñ kī mahfil se nazreñ churā.e

maiñ ki ḳhud sāġhar-e-shauq

paimāna-e-jazb-o-mastī

halqa-e-mai-gusārāñ se dāman bachā.e

maiñ ki ḳhud jur.at-e-ehtirām-e-dīd

ḳhud jur.at-e-ehtirām

sirf ik jur.at-e-ārzū par pashemāñ

maiñ ki ḳhud saare aalam ke dard-o-alam kī amiiñ

apne zaḳhmoñ ke ātish-navā.ī pe ḳhandāñ

maiñ ki har rāz-e-sar-basta se āshnā

maiñ ki āhañg-e-hastī kī hamrāz huuñ

maiñ huuñ sadiyoñ kī khoī huī ik sadā

maiñ anāsir kā TuuTā huā saaz huuñ

main ki la-intiha waqt ki rahguzar par

sirf ek lamha-e-muKHtasar

main ki ehsas-o-afkar ke bahr-e-zaKHKHar mein

sirf ek qatra-e-muztarib mein ki sahra-e-hasti ki tapti hui ret par

sirf ek zarra sar-nigun

main ki ek wusat kaenat-e-hasin mein

sirf ek nuqta-e-be-sukun

main wo qatra ki jis mein samundar ki betabiyan maujzan hain

wo lamha jo mustaqbil-o-haal-o-mazi ka aaina hai

main wo nuqta ki jo gardish-e-dahr ka aashna hai

main wo zarra ki sahra-e-hasti ki tishna-labi

apne dil mein chhupae

main wo ek jism-e-nazuk ki jo

nasl-e-insan ke dard aur isyan ka bar-e-garan

apne sar par uThae

main wo ek chashm-e-pur-shauq jis ke liye wusat-e-dasht-o-sahra bhi kam thi

main ne phir chand taron par Dali kamanden

aasmanon ke wo jagmagate makin

is anokhi jasarat pe sab muskurae

main ki KHud mahram-e-zauq-e-parwaz

hamraaz sar-e-bulandi

chand taron ki mahfil se nazren churae

main ki KHud saghar-e-shauq

paimana-e-jazb-o-masti

halqa-e-mai-gusaran se daman bachae

main ki KHud jurat-e-ehtiram-e-did

KHud jurat-e-ehtiram

sirf ek jurat-e-arzu par pasheman

main ki KHud sare aalam ke dard-o-alam ki amin

apne zaKHmon ke aatish-nawai pe KHandan

main ki har raaz-e-sar-basta se aashna

main ki aahang-e-hasti ki hamraaz hun

main hun sadiyon ki khoi hui ek sada

main anasir ka TuTa hua saz hun