himala ki dasiyan

himāla ke nokīle badan se phisaltī huī chanchal būñdeñ

us ke qadmoñ pe jā girīñ

vo himāla ke pairoñ ko chūmtī rahīñ aur alamiya giit gaatī rahīñ

mere mahbūb ham ki bas terī dāsiyāñ ban kar

tire qadmoñ ko hamesha chūmte rahnā chāhtī haiñ,

ye Dhalvān hameñ junūb kī or jitnā bhī aage bahā le jaa.e

lekin ek din

ham samundar se uThne vaalī havāoñ kī rath par savār ho kar

phir se terī jānib lauT ā.eñge

ye giit dohrāte hue

tamām dāsiyāñ apne mahbūb ko āḳhirī bosa de kar

ek lambe safar ke liye nikal jātīñ haiñ

jharnā,

nadī,

dariyā,

samundar....

himāla kī haibat se barf ho jaane vaalā sūraj

jab himāla se lipTī sard havāoñ se na jiit sakā

to

apnī haar kā badla lene

himāla kī dāsiyoñ ke ta.āqub meñ nikal paḌtā hai

juuñ juuñ dāsiyāñ himāla se duur hotī jā rahī haiñ

is (sūraj) kā qahr aag bin kar un (dāsiyoñ) par barastā chalā jaatā

vo ek ek kar ke tamām dāsiyoñ ko nigalnā chāhtā hai

aur vo aisā hī kartā hai aur kartā hī chalā jaatā hai

yahāñ tak ki

har daasī ke giile badan se us kī ruuh bhaap ban kar uḌ jaatī

lā-zavāl qurbānī ḳhudā qubūl kartā hai

maut andhī ho jaatī hai......

aur zindagī paanī ban kar un (dāsiyoñ) kī ragoñ meñ dauḌne lagtī hai

junūb se uThne vaalī havā

in dāsiyoñ kī paak rūhoñ ko

apne kāñdhe par laade shumāl kī jānib vāpsī kā safar kartīñ haiñ

din

hafte

mahīne....

dāsiyoñ ko apnā devtā phir nazar aane lagā

vo havā ko kuchh aur tez chalne ko kahtī

vo sab bechain haiñ

be-qarār haiñ

vo apne narm hoñToñ se

himāla ke ḳhākistarī laboñ ko chūmnā chāhtī thiiñ

vo apne mahbūb ko ye batānā chāhtī haiñ ki

terī mohabbat meñ maut ne ham se hamārā badan chhīn liyā hai

har badlī ke dil meñ ye ḳhvāhish thī

ki himāla unheñ apnī bāñhoñ meñ sameTe

aur

hamesha se sar uThā.e khaḌe rahne vaale himāla kī

chauḌī chhātī se Takrā kar baras jaanā

har badlī kā ḳhvāb hai,

dāsiyāñ havā se kuchh aur tez chalne par isrār kartīñ haiñ

lekin ab havā ko ye sab dekhnā bardāsht nahīñ

vo,

in badliyoñ se chillā chillā kar kahtī......

ai badliyo

tum sab ehsān farāmosh ho

ki jab tumheñ sūraj ne jalā kar bhaap banā diyā

to tumhārī sūkhī lāshoñ ko maiñ ne kāñdhā diyā

vo maiñ hī thī ki jis ne tumheñ apnī āġhosh meñ bharā

aur āsmān tak le aa.ī

lekin aaj tum is himāla par

phir se apnā sab kuchh qurbān karne ko tayār ho!

tum aaj phir us himāla se Takrā kar barasnā chāhtī ho.....

tuf hai tumhārī dīvāngī par!

havā taish meñ aa kar kuchh aur tez chalne lagtī

vo ek ek kar ke har badlī ko himāla kī chauḌī chhātī se Takrā detī

aur badlī apne mahbūb kā lams mahsūs karte hī

ek-bār phir būñdoñ meñ bikhar jaatī hai

aur himāla ke qadmoñ pe girtī har buuñd

dobāra vahī purānā giit dohrātī haiñ......

ai mere mahbūb ham ki bas terī dāsiyāñ ban kar

tire qadmoñ ko hamesha chūmte rahnā chāhtī haiñ,

ye Dhalvān hameñ junūb kī or jitnā bhī aage bahā le jaa.e

lekin ek din

ham samundar se uThne vaalī havāoñ kī rath par savār ho kar

phir se terī jānib lauT ā.eñge

himala ke nokile badan se phisalti hui chanchal bunden

us ke qadmon pe ja girin

wo himala ke pairon ko chumti rahin aur alamiya git gati rahin

mere mahbub hum ki bas teri dasiyan ban kar

tere qadmon ko hamesha chumte rahna chahti hain,

ye Dhalwan hamein junub ki or jitna bhi aage baha le jae

lekin ek din

hum samundar se uThne wali hawaon ki rath par sawar ho kar

phir se teri jaanib lauT aaenge

ye git dohraate hue

tamam dasiyan apne mahbub ko aaKHiri bosa de kar

ek lambe safar ke liye nikal jatin hain

jharna,

nadi,

dariya,

samundar

himala ki haibat se barf ho jaane wala suraj

jab himala se lipTi sard hawaon se na jit saka

to

apni haar ka badla lene

himala ki dasiyon ke taaqub mein nikal paDta hai

jun jun dasiyan himala se dur hoti ja rahi hain

is (suraj) ka qahr aag bin kar un (dasiyon) par barasta chala jata

wo ek ek kar ke tamam dasiyon ko nigalna chahta hai

aur wo aisa hi karta hai aur karta hi chala jata hai

yahan tak ki

har dasi ke gile badan se us ki ruh bhap ban kar uD jati

la-zawal qurbani KHuda qubul karta hai

maut andhi ho jati hai

aur zindagi pani ban kar un (dasiyon) ki ragon mein dauDne lagti hai

junub se uThne wali hawa

in dasiyon ki pak ruhon ko

apne kandhe par lade shumal ki jaanib wapsi ka safar kartin hain

din

hafte

mahine

dasiyon ko apna dewta phir nazar aane laga

wo hawa ko kuchh aur tez chalne ko kahti

wo sab bechain hain

be-qarar hain

wo apne narm honTon se

himala ke KHakistari labon ko chumna chahti thin

wo apne mahbub ko ye batana chahti hain ki

teri mohabbat mein maut ne hum se hamara badan chhin liya hai

har badli ke dil mein ye KHwahish thi

ki himala unhen apni banhon mein sameTe

aur

hamesha se sar uThae khaDe rahne wale himala ki

chauDi chhati se Takra kar baras jaana

har badli ka KHwab hai,

dasiyan hawa se kuchh aur tez chalne par israr kartin hain

lekin ab hawa ko ye sab dekhna bardasht nahin

wo,

in badliyon se chilla chilla kar kahti

ai badliyo

tum sab ehsan faramosh ho

ki jab tumhein suraj ne jala kar bhap bana diya

to tumhaari sukhi lashon ko main ne kandha diya

wo main hi thi ki jis ne tumhein apni aaghosh mein bhara

aur aasman tak le aai

lekin aaj tum is himala par

phir se apna sab kuchh qurban karne ko tayar ho!

tum aaj phir us himala se Takra kar barasna chahti ho

tuf hai tumhaari diwangi par!

hawa taish mein aa kar kuchh aur tez chalne lagti

wo ek ek kar ke har badli ko himala ki chauDi chhati se Takra deti

aur badli apne mahbub ka lams mahsus karte hi

ek-bar phir bundon mein bikhar jati hai

aur himala ke qadmon pe girti har bund

dobara wahi purana git dohraati hain

ai mere mahbub hum ki bas teri dasiyan ban kar

tere qadmon ko hamesha chumte rahna chahti hain,

ye Dhalwan hamein junub ki or jitna bhi aage baha le jae

lekin ek din

hum samundar se uThne wali hawaon ki rath par sawar ho kar

phir se teri jaanib lauT aaenge