himmat-e-mardan

na.ī tahzīb ne barbād ġhārat kar diyā bilkul

ham apne mulk se ab is ko ġhārat kar ke chhoḌeñge

hamāre ilm o fan sab is ne ruḳhsat kar diye ham se

ham ab hindostāñ se is ko ruḳhsat kar ke chhoḌeñge

ġhulāmī ne hamāre saare jauhar ḳhaak kar Daale

ham apne mulk se duur ab ye la.anat kar ke chhoḌeñge

ham apne mulk par qabza kareñge jis tarah hogā

zabān-e-be-kasī se ḳhatm hujjat kar ke chhoḌeñge

fanā kar deñge ahl-e-jabr-o-istibdād kī hastī

zamīñ meñ dafn rasm-e-jahal-o-vahshat kar ke chhoḌeñge

miTā Dāleñge ham har ḳhud-sar o maġhrūr kā ġhurra

tah-o-bālā nizām-e-kibr-o-naḳhvat kar ke chhoḌeñge

haTā deñge har ik sañg-e-girāñ ko apne raste se

numāyāñ apnī shān-e-istaqāmat kar ke chhoḌeñge

agar koh-e-girāñ bhī hogā apnī raah meñ haa.il

use bhī pā.emāl-e-azm-o-himmat kar ke chhoḌeñge

ġharaz ab ye tahayya kar liyā hai mustaqil ham ne

fanā ik din ye tāġhūtī hukūmat kar ke chhoḌeñge

nai tahzib ne barbaad ghaarat kar diya bilkul

hum apne mulk se ab is ko ghaarat kar ke chhoDenge

hamare ilm o fan sab is ne ruKHsat kar diye hum se

hum ab hindostan se is ko ruKHsat kar ke chhoDenge

ghulami ne hamare sare jauhar KHak kar Dale

hum apne mulk se dur ab ye lanat kar ke chhoDenge

hum apne mulk par qabza karenge jis tarah hoga

zaban-e-be-kasi se KHatm hujjat kar ke chhoDenge

fana kar denge ahl-e-jabr-o-istibdad ki hasti

zamin mein dafn rasm-e-jahal-o-wahshat kar ke chhoDenge

miTa Dalenge hum har KHud-sar o maghrur ka ghurra

tah-o-baala nizam-e-kibr-o-naKHwat kar ke chhoDenge

haTa denge har ek sang-e-giran ko apne raste se

numayan apni shan-e-istaqamat kar ke chhoDenge

agar koh-e-giran bhi hoga apni rah mein hail

use bhi paemal-e-azm-o-himmat kar ke chhoDenge

gharaz ab ye tahayya kar liya hai mustaqil hum ne

fana ek din ye taghuti hukumat kar ke chhoDenge