hindi hindustani

sāf-suthrī zabān hindī hai

ḳhush-bayānī kī jaan hindī hai

hindiyoñ kā nishān hindī hai

auj meñ āsmān hindī hai

roz-marra jo bol-chāl kā hai

husn vo shoḳhī-e-ḳhayāl kā hai

us ke phūloñ kī tez hai ḳhushbū

har taraf mushk-rez hai ḳhushbū

vāqa.ī itr-bez hai ḳhushbū

ishrat-e-mauj-ḳhez hai ḳhushbū

shakl kaisī hasīn hai is kī

brij-bhāshā zamīn hai is kī

kyā milansār hai mizāj is kā

sulh-jūī hai kām-kāj is kā

saare sansār meñ hai raaj is kā

sikka baiThā huā hai aaj is kā

marhaTī kuchh hai kuchh hai punjabi

hai fasāhat meñ nutq-e-ā.arābī

fārsī kī sughaḌ sahelī hai

aur turkī ke saath khelī hai

jo pasand aa.ī chiiz le lī hai

chīstāñ hai kahīñ pahelī hai

lāl-qil.e meñ begmātī thī

saath shahzādiyoñ ke jaatī thī

des-bhar kī ye ek hai baanī

hindunī hai na ye musalmānī

bol sakte haiñ is ko īrānī

siikh sakte haiñ sab ba-āsānī

kuchh milī haiñ jo un se sauġhāteñ

leadiyoñ se haiñ rāt-din bāteñ

kis qadar bol-chāl hai saada

'sūr' 'tulsī' the is ke dil-dāda

kaif-zā hai ye sūrat-e-bāda

pī rahā thā 'kabīr' āzāda

'ras' 'bihārī' the gul-fishāñ is meñ

ab haiñ 'kaifī' se ḳhush-bayāñ is meñ

saf-suthri zaban hindi hai

KHush-bayani ki jaan hindi hai

hindiyon ka nishan hindi hai

auj mein aasman hindi hai

roz-marra jo bol-chaal ka hai

husn wo shoKHi-e-KHayal ka hai

us ke phulon ki tez hai KHushbu

har taraf mushk-rez hai KHushbu

waqai itr-bez hai KHushbu

ishrat-e-mauj-KHez hai KHushbu

shakl kaisi hasin hai is ki

brij-bhasha zamin hai is ki

kya milansar hai mizaj is ka

sulh-jui hai kaam-kaj is ka

sare sansar mein hai raj is ka

sikka baiTha hua hai aaj is ka

marhaTi kuchh hai kuchh hai punjabi

hai fasahat mein nutq-e-aarabi

farsi ki sughaD saheli hai

aur turki ke sath kheli hai

jo pasand aai chiz le li hai

chistan hai kahin paheli hai

lal-qile mein begmati thi

sath shahzadiyon ke jati thi

des-bhar ki ye ek hai bani

hinduni hai na ye musalmani

bol sakte hain is ko irani

sikh sakte hain sab ba-asani

kuchh mili hain jo un se saughaten

leadiyon se hain raat-din baaten

kis qadar bol-chaal hai sada

'sur' 'tulsi' the is ke dil-dada

kaif-za hai ye surat-e-baada

pi raha tha 'kabir' aazada

'ras' 'bihaari' the gul-fishan is mein

ab hain 'kaifi' se KHush-bayan is mein