hindostan

go ḳhaak ho chukā hai hindostāñ hamārā

phir bhī hai kul jahāñ meñ pallā garāñ hamārā

muñh tak rahā hai ab tak saarā jahāñ hamārā

hai naam kishvaroñ meñ vird-e-zabāñ hamārā

zarḳhez hai sarāsar ye gulistāñ hamārā

hai tā.ir-e-tilā.ī hindostāñ hamārā

bhārat meñ dekhte the ham san.ateñ jahāñ kī

mash.hūr thī jahāñ meñ kārīgarī yahāñ kī

vo baat hindiyoñ ne ġhairoñ ke darmiyāñ kī

jis par jhukī hai gardan amboh-e-sarkashāñ kī

miltā thā ilm-o-fan meñ ham-sar kahāñ hamārā

hai tā.ir-e-talā.ī hindostāñ hamārā

taslīm kar rahe haiñ espen aur jāpāñ

sab mānte haiñ lohā german france-o-yūnañ

america meñ hai charchā is mulk kā numāyāñ

bhārat kī saltanat par bartāniya hai nāzāñ

ūñchā hai āsmāñ se ye āstāñ hamārā

hai tā.ir-e-tilā.ī hindostāñ hamārā

parbat kī choTiyāñ haiñ darbāñ hamāre dar kī

dāman meñ jis ke pinhāñ kāneñ haiñ sīm-o-zar kī

gañg-o-jaman pe jis dam sayyād ne nazar kī

sarsabz vādiyoñ se is kī nazar na sar kī

kyā ġhairat-e-iram hai ye bostāñ hamārā

hai tā.ir-e-tilā.ī hindostāñ hamārā

paidā kiye the jis ne arjun kanād gautam

āġhosh meñ pale the jis kī byās-o-bikram

godī meñ jis kī khele the bhiim raam bhisham

jin ke sabab se ab tak hai hindiyoñ meñ dam-ḳham

vo mulk-e-be-badal hai jannat-nishāñ hamārā

hai tā.ir-e-tilā.ī hindostāñ hamārā

go KHak ho chuka hai hindostan hamara

phir bhi hai kul jahan mein palla garan hamara

munh tak raha hai ab tak sara jahan hamara

hai nam kishwaron mein wird-e-zaban hamara

zarKHez hai sarasar ye gulistan hamara

hai tair-e-tilai hindostan hamara

bhaarat mein dekhte the hum sanaten jahan ki

mashhur thi jahan mein karigari yahan ki

wo baat hindiyon ne ghairon ke darmiyan ki

jis par jhuki hai gardan amboh-e-sarkashan ki

milta tha ilm-o-fan mein ham-sar kahan hamara

hai tair-e-talai hindostan hamara

taslim kar rahe hain espen aur japan

sab mante hain loha german france-o-yunan

america mein hai charcha is mulk ka numayan

bhaarat ki saltanat par bartaniya hai nazan

uncha hai aasman se ye aastan hamara

hai tair-e-tilai hindostan hamara

parbat ki choTiyan hain darban hamare dar ki

daman mein jis ke pinhan kanen hain sim-o-zar ki

gang-o-jaman pe jis dam sayyaad ne nazar ki

sarsabz wadiyon se is ki nazar na sar ki

kya ghairat-e-iram hai ye bostan hamara

hai tair-e-tilai hindostan hamara

paida kiye the jis ne arjun kanad gautam

aaghosh mein pale the jis ki byas-o-bikram

godi mein jis ki khele the bhim ram bhisham

jin ke sabab se ab tak hai hindiyon mein dam-KHam

wo mulk-e-be-badal hai jannat-nishan hamara

hai tair-e-tilai hindostan hamara