hindostan

ḳhār-o-ḳhas ke jhoñpaḌe miTTī ke bosīda makāñ

jaise andhoñ ke ishāre jaise gūñgoñ kī zabāñ

jis tarah utre hue chehroñ pe aañsū ke nishāñ

jis tarah sūkhī huī Tahnī pe ujḌe āshiyāñ

daaġh jin ke sāz-o-sāmāñ dard jin kā pāsbāñ

kyā isī duniyā meñ tū paltā hai ai hindostāñ

ek Dhāñcha haDDiyoñ kā ek chaltī-phirtī laash

jis ko qabristān meñ hai zindagānī kī talāsh

jis ke dil kī dhaḌkanoñ meñ ġham ke phāñsoñ kī ḳharāsh

be-kasī jis kā sahārā muflisī jis kī ma.āsh

dast-o-bāzū jis ke shal jis kā safīna paash paash

kyā isī ko pāltī hai mādar-e-hindostāñ

dhuup se jhulse hue bachche pe fāqoñ ke sitam

jis kī nannhī sī zabāñ sūkhī huī aur aañkh nam

jaise kachchī niiñd se nāzuk papoToñ par varam

jaise mīnā-e-tahī ke dil meñ fikr-e-besh-o-kam

jaise be-ras phuul jaise band muTThī kā bharam

kyā isī ko pāltī hai mādar-e-hindostāñ

is jafā-parvarda ummat ke jafā-parvar imaam

qasr-o-aivāñ ke pujārī zar ke bande-o-ġhulām

ḳhūn-e-dahqāñ se hai rangīñ jin kī azmat kā maqām

jin ke maz.hab meñ sadāqat aur hamdardī harām

kyā unhīñ ke haath meñ hai terī qismat kī lagām

sharm ai hindostāñ afsos ai hindostāñ

ek armān-e-masarrat ek armān-e-qarār

jaise be-pāyāñ samundar ke kināre jū-e-bār

jaise registān meñ bhaTkī huī mauj-e-bahār

jaise vahmoñ kī parastish jaise sāyoñ kā shikār

arz par jaise farishte shahr meñ jaise gañvār

kyā yahī hai iztirāb-e-ārzū hindostāñ

ek āh-e-nā-rasā begāna-e-zauq-e-suḳhan

jaise pahlī shaam ko mahtāb kī maddham kiran

jaise ik andhī kuñvārī kā adhūrā bāñkpan

jaise murjhā.ī huī kaliyoñ meñ rūdād-e-chaman

jaise ik so.e hue kāfir kī abrū meñ shikan

kyā yahī hai quvvat-e-fariyād ai hindostāñ

ik sisaktā saañs ik TuuTā huā tār-e-rabāb

jaise gahrī fikr meñ pichhle pahar kā māhtāb

jaise baasī phuul kī bū jaise patjhaḌ kā gulāb

jaise din meñ chāñd taare jaise dariyā meñ habāb

jaise dīvāne kī jannat jaise muflis kā shabāb

kyā isī ko zindagī kahte haiñ ai hindostāñ

maut kī parchhā.iyoñ meñ palne vaalī zindagī

āñkhoñ se bin TimTimā kar jaane vaalī zindagī

zulmatoñ meñ apnī āñkheñ milne vaalī zindagī

thaam kar laġhzish kā dāman chalne vaalī zindagī

ġham ke sāñche meñ musalsal Dhalne vaalī zindagī

kyā isī ko zindagī kahte haiñ ai hindostāñ

qismatoñ ke dā.ere meñ ghūmne vaalā samāj

Dasne vaalī ek nāgin ek zahrīlā mizāj

nang-e-hastī sar pe ik auhām kī pastī kā taaj

muflisoñ se jo liyā kartī hai gin gin kar ḳhirāj

dafn ho jaatā hai jis ke haath se har roz aaj

kyā isī ke haath meñ hai parcham-e-hindostāñ

āñsuoñ ke naam se kab tak girāyā jā.egā

nāla-o-fariyād meñ kab tak sunāyā jā.egā

ek gahrī niiñd meñ kab tak sulāyā jā.egā

parda-e-taqdīr meñ kab tak chhupāyā jā.egā

tū satāyā jā chukā kab tak satāyā jā.egā

jaag ai hindostāñ haañ jaag ai hindostāñ

KHar-o-KHas ke jhonpaDe miTTi ke bosida makan

jaise andhon ke ishaare jaise gungon ki zaban

jis tarah utre hue chehron pe aansu ke nishan

jis tarah sukhi hui Tahni pe ujDe aashiyan

dagh jin ke saz-o-saman dard jin ka pasban

kya isi duniya mein tu palta hai ai hindostan

ek Dhancha haDDiyon ka ek chalti-phirti lash

jis ko qabristan mein hai zindagani ki talash

jis ke dil ki dhaDkanon mein gham ke phanson ki KHarash

be-kasi jis ka sahaara muflisi jis ki maash

dast-o-bazu jis ke shal jis ka safina pash pash

kya isi ko palti hai madar-e-hindostan

dhup se jhulse hue bachche pe faqon ke sitam

jis ki nannhi si zaban sukhi hui aur aankh nam

jaise kachchi nind se nazuk papoTon par waram

jaise mina-e-tahi ke dil mein fikr-e-besh-o-kam

jaise be-ras phul jaise band muTThi ka bharam

kya isi ko palti hai madar-e-hindostan

is jafa-parwarda ummat ke jafa-parwar imam

qasr-o-aiwan ke pujari zar ke bande-o-ghulam

KHun-e-dahqan se hai rangin jin ki azmat ka maqam

jin ke mazhab mein sadaqat aur hamdardi haram

kya unhin ke hath mein hai teri qismat ki lagam

sharm ai hindostan afsos ai hindostan

ek arman-e-masarrat ek arman-e-qarar

jaise be-payan samundar ke kinare ju-e-bar

jaise registan mein bhaTki hui mauj-e-bahaar

jaise wahmon ki parastish jaise sayon ka shikar

arz par jaise farishte shahr mein jaise ganwar

kya yahi hai iztirab-e-arzu hindostan

ek aah-e-na-rasa begana-e-zauq-e-suKHan

jaise pahli sham ko mahtab ki maddham kiran

jaise ek andhi kunwari ka adhura bankpan

jaise murjhai hui kaliyon mein rudad-e-chaman

jaise ek soe hue kafir ki abru mein shikan

kya yahi hai quwwat-e-fariyaad ai hindostan

ek sisakta sans ek TuTa hua tar-e-rabab

jaise gahri fikr mein pichhle pahar ka mahtab

jaise basi phul ki bu jaise patjhaD ka gulab

jaise din mein chand tare jaise dariya mein habab

jaise diwane ki jannat jaise muflis ka shabab

kya isi ko zindagi kahte hain ai hindostan

maut ki parchhaiyon mein palne wali zindagi

aankhon se bin TimTima kar jaane wali zindagi

zulmaton mein apni aankhen milne wali zindagi

tham kar laghzish ka daman chalne wali zindagi

gham ke sanche mein musalsal Dhalne wali zindagi

kya isi ko zindagi kahte hain ai hindostan

qismaton ke daere mein ghumne wala samaj

Dasne wali ek nagin ek zahrila mizaj

nang-e-hasti sar pe ek auham ki pasti ka taj

muflison se jo liya karti hai gin gin kar KHiraj

dafn ho jata hai jis ke hath se har roz aaj

kya isi ke hath mein hai parcham-e-hindostan

aansuon ke nam se kab tak giraya jaega

nala-o-fariyaad mein kab tak sunaya jaega

ek gahri nind mein kab tak sulaya jaega

parda-e-taqdir mein kab tak chhupaya jaega

tu sataya ja chuka kab tak sataya jaega

jag ai hindostan han jag ai hindostan