hindostan

muflis yahāñ nahīñ haiñ ki beva yahāñ nahīñ

aisā koī nahīñ hai jo āfat-nishāñ nahīñ

ye baat misl-e-shams ayaañ hai nihāñ nahīñ

āzād gar nahīñ hai to hindostāñ nahīñ

zikr-e-chaman zabān par laayā na jā.egā

ab qissa-e-bahār sunāyā na jā.egā

mahsūs kar rahā huuñ batāyā na jā.egā

āzād agar nahīñ hai to hindostāñ nahīñ

zulm-o-sitam se kaam liyā jā rahā hai aaj

insāf ko tabāh kiyā jā rahā hai aaj

har mulk ko faroġh diyā jā rahā hai aaj

āzād agar nahīñ hai to hindostāñ nahīñ

ye kah ke kis ne qalb-e-do-ālam hilā diyā

shaitāñ laraz uThā to malak muskurā diyā

ḳhvāb-e-adam se kushta-e-ġham ko jagā diyā

āzād agar nahīñ hai to hindostāñ nahīñ

har chand aa rahā hai zamāne meñ inqalāb

lekin zabān-e-hāl se kahtā hai āftāb

naslī ġhulām dekh rahe haiñ hanūz ḳhvāb

āzād agar nahīñ hai to hindostāñ nahīñ

taḳhta ulaT na jaa.e kahīñ kā.enāt kā

qulzum meñ ġharq ho na safīna hayāt kā

detā nahīñ javāb koī merī baat kā

āzād agar nahīñ hai to hindostāñ nahīñ

sayyād ko jhiñjhoḌ rihā.ī isī meñ hai

tauq-e-ġhulāmī toḌ rihā.ī isī meñ hai

ro ro ke kahnā chhoḌ rihā.ī isī meñ hai

āzād agar nahīñ hai to hindostāñ nahīñ

duniyā tulī huī hai baġhāvat pe āj-kal

kyā dekhtā hai teġh uThā tevrī badal

maidān-e-kār-zār meñ kahtā huā nikal

āzād agar nahīñ hai to hindostāñ nahīñ

sehat dil-o-dimāġh baqā aur zindagī

in ne.amatoñ se duur rahe aah aadmī

is par ye lutf hai ki nahīñ ye bhī āgahī

āzād agar nahīñ hai to hindostāñ nahīñ

duniyā kā har nizām badal jā.egā kabhī

har har marīz-e-mulk sambhal jā.egā kabhī

ye kahte kahte dam bhī nikal jaa.e kabhī

āzād agar nahīñ hai to hindostāñ nahīñ

insān zindabād ke na.are buland kar

dair-o-haram ke roz ke jhagḌoñ se dar-guzar

ahl-e-jafā ke sāmne kahte hue na Dar

āzād agar nahīñ hai to hindostāñ nahīñ

tūfān kā nadīm tabāhī kā yaar huuñ

bāġhī huuñ aur dushman-e-sabr-o-qarār huuñ

lekin vatan ke haal pe mātam-gusār huuñ

āzād agar nahīñ hai to hindostāñ nahīñ

insāniyat kī dahr meñ tazlīl kyuuñ na ho

sarmāya-dār luuT rahe haiñ ġharīb ko

'shātir' agar yaqīn na ho aa ke dekh lo

āzād agar nahīñ hai to hindostāñ nahīñ

muflis yahan nahin hain ki bewa yahan nahin

aisa koi nahin hai jo aafat-nishan nahin

ye baat misl-e-shams ayan hai nihan nahin

aazad gar nahin hai to hindostan nahin

zikr-e-chaman zaban par laya na jaega

ab qissa-e-bahaar sunaya na jaega

mahsus kar raha hun bataya na jaega

aazad agar nahin hai to hindostan nahin

zulm-o-sitam se kaam liya ja raha hai aaj

insaf ko tabah kiya ja raha hai aaj

har mulk ko farogh diya ja raha hai aaj

aazad agar nahin hai to hindostan nahin

ye kah ke kis ne qalb-e-do-alam hila diya

shaitan laraz uTha to malak muskura diya

KHwab-e-adam se kushta-e-gham ko jaga diya

aazad agar nahin hai to hindostan nahin

har chand aa raha hai zamane mein inqalab

lekin zaban-e-haal se kahta hai aaftab

nasli ghulam dekh rahe hain hanuz KHwab

aazad agar nahin hai to hindostan nahin

taKHta ulaT na jae kahin kaenat ka

qulzum mein gharq ho na safina hayat ka

deta nahin jawab koi meri baat ka

aazad agar nahin hai to hindostan nahin

sayyaad ko jhinjhoD rihai isi mein hai

tauq-e-ghulami toD rihai isi mein hai

ro ro ke kahna chhoD rihai isi mein hai

aazad agar nahin hai to hindostan nahin

duniya tuli hui hai baghawat pe aaj-kal

kya dekhta hai tegh uTha tewri badal

maidan-e-kar-zar mein kahta hua nikal

aazad agar nahin hai to hindostan nahin

sehat dil-o-dimagh baqa aur zindagi

in neamaton se dur rahe aah aadmi

is par ye lutf hai ki nahin ye bhi aagahi

aazad agar nahin hai to hindostan nahin

duniya ka har nizam badal jaega kabhi

har har mariz-e-mulk sambhal jaega kabhi

ye kahte kahte dam bhi nikal jae kabhi

aazad agar nahin hai to hindostan nahin

insan zindabaad ke nare buland kar

dair-o-haram ke roz ke jhagDon se dar-guzar

ahl-e-jafa ke samne kahte hue na Dar

aazad agar nahin hai to hindostan nahin

tufan ka nadim tabahi ka yar hun

baghi hun aur dushman-e-sabr-o-qarar hun

lekin watan ke haal pe matam-gusar hun

aazad agar nahin hai to hindostan nahin

insaniyat ki dahr mein tazlil kyun na ho

sarmaya-dar luT rahe hain gharib ko

'shatir' agar yaqin na ho aa ke dekh lo

aazad agar nahin hai to hindostan nahin