hindustani laDkon ka tarana

ham se hī phūloñ kī phaban hai

ham se hī shādāb chaman hai

josh-o-ḳharosh-e-gang-o-jaman hai

shān-e-vatan hai husn-e-vatan hai

ham kyā haiñ taqdīr-e-vatan haiñ

masrūf-e-ta.amīr-e-vatan haiñ

azmat-e-māzī rif.at-e-fardā

raunaq-e-mahfil zīnat-e-duniyā

shaam kā manzar sub.h kā jalvā

gulshan gulshan sahrā sahrā

gul ye khile haiñ fikr-o-nazar ke

sīñchā hai ham ne ḳhūn-e-jigar se

masjid mandir dair kalīsā

taaj mahal elora ajantā

jantar-mantar qutb mināra

kabhī añdherā kabhī ujālā

ham se hī tārīḳh-e-vatan hai

baaqī har ik naqsh-e-kuhan hai

josh-e-amal hai dil meñ hamāre

sard fazā meñ ham haiñ sharāre

toḌ ke laa.eñ charḳh se taare

rokeñ tūfāñ moḌ deñ dhāre

ho ho kar balvān baḌheñge

jag meñ ham parvān chaḌheñge

saḳht marāhil raah meñ aa.eñ

laakh havādis aañkh dikhā.eñ

haa.il agar hoñ tund havā.eñ

vo bhī ham se muñh kī khā.eñ

āñdhī ban kar tez chaleñge

aur manzil par jā ke raheñge

hum se hi phulon ki phaban hai

hum se hi shadab chaman hai

josh-o-KHarosh-e-gang-o-jaman hai

shan-e-watan hai husn-e-watan hai

hum kya hain taqdir-e-watan hain

masruf-e-tamir-e-watan hain

azmat-e-mazi rifat-e-farda

raunaq-e-mahfil zinat-e-duniya

sham ka manzar subh ka jalwa

gulshan gulshan sahra sahra

gul ye khile hain fikr-o-nazar ke

sincha hai hum ne KHun-e-jigar se

masjid mandir dair kalisa

taj mahal elora ajanta

jantar-mantar qutb minara

kabhi andhera kabhi ujala

hum se hi tariKH-e-watan hai

baqi har ek naqsh-e-kuhan hai

josh-e-amal hai dil mein hamare

sard faza mein hum hain sharare

toD ke laen charKH se tare

roken tufan moD den dhaare

ho ho kar balwan baDhenge

jag mein hum parwan chaDhenge

saKHt marahil rah mein aaen

lakh hawadis aankh dikhaen

hail agar hon tund hawaen

wo bhi hum se munh ki khaen

aandhi ban kar tez chalenge

aur manzil par ja ke rahenge