hindu aur musalman

faḳhr-e-vatan haiñ donoñ aur donoñ muqtadar haiñ

haiñ phuul ik chaman ke ik naḳhl ke samar haiñ

ai qaum tere dukh ke donoñ hī chāragar haiñ

donoñ jigar jigar haiñ lekin digar digar haiñ

aapas ke tafraqoñ se haiñ aah ḳhaar donoñ

aġhyār kī nazar meñ haiñ be-vaqār donoñ

mil kar chalo ki āḳhir donoñ ho bhaa.ī bhaa.ī

bhaa.ī se kyā laḌā.ī bhaa.ī se kyā burā.ī

kab tak ye ḳhāna-jangī kab tak ye ḳhud-sitā.ī

do bhā.iyoñ ko hargiz zebā nahīñ judā.ī

mil kar gale nikālo dil kā ġhubār donoñ

is ḳhaak ke ho putle pāyān-e-kār donoñ

rashk-e-jināñ banāo hindostāñ ko mil kar

ḳhūn-e-jigar se sīñcho is gulistāñ ko mil kar

lahrāo āsmāñ par qaumī nishāñ ko mil kar

do āb-e-jāñ-nisārī nok-e-sināñ ko mil kar

faKHr-e-watan hain donon aur donon muqtadar hain

hain phul ek chaman ke ek naKHl ke samar hain

ai qaum tere dukh ke donon hi chaaragar hain

donon jigar jigar hain lekin digar digar hain

aapas ke tafraqon se hain aah KHar donon

aghyar ki nazar mein hain be-waqar donon

mil kar chalo ki aaKHir donon ho bhai bhai

bhai se kya laDai bhai se kya burai

kab tak ye KHana-jangi kab tak ye KHud-sitai

do bhaiyon ko hargiz zeba nahin judai

mil kar gale nikalo dil ka ghubar donon

is KHak ke ho putle payan-e-kar donon

rashk-e-jinan banao hindostan ko mil kar

KHun-e-jigar se sincho is gulistan ko mil kar

lahrao aasman par qaumi nishan ko mil kar

do aab-e-jaan-nisari nok-e-sinan ko mil kar