hippy

sunā hai

ki asrār khulte the agle zamāne meñ insān pe jab zindagī ke

to vo shahr aur bastiyoñ se nikal kar chalā jaatā thā phir

kahīñ jangaloñ meñ guphāoñ meñ kartā ḳhud apnā tajassus

liye ek anjānī manzil kī dil meñ tamannā

ta'alluq kī dīvār-e-bosīda Dhā kar

sar apnā muñDā kar

ramātā thā dhūnī

use log kahte the sanyāsī sādhū

magar aaj kuchh aur hī kaifiyat hai

havādis se afkār se zindagī ke ġhamoñ se bashar bhāgtā hai

unheñ ajnabī jāntā hai

tasallī sahāroñ kī pahchāntā hai

na haal aur fardā na maazī kā ġham hai

na apnī ḳhabar hai na apnoñ se matlab na ġhairoñ kī parvā

kabhī baiTh kar hoTaloñ meñ ye piitā hai coffē

dhueñ meñ kabhī kho ke ye nāchtā hai

kabhī ghūmtā hai ye galiyoñ meñ āvāra hairāñ

baḌhā.e hue baal ruḳhsār-o-sar ke

libās-e-barahna badan par sajā.e

banā.e hue bhes sanyāsiyoñ kā

ab us ne rakhā hai hippy naam apnā

suna hai

ki asrar khulte the agle zamane mein insan pe jab zindagi ke

to wo shahr aur bastiyon se nikal kar chala jata tha phir

kahin jangalon mein guphaon mein karta KHud apna tajassus

liye ek anjaani manzil ki dil mein tamanna

ta'alluq ki diwar-e-bosida Dha kar

sar apna munDa kar

ramata tha dhuni

use log kahte the sanyasi sadhu

magar aaj kuchh aur hi kaifiyat hai

hawadis se afkar se zindagi ke ghamon se bashar bhagta hai

unhen ajnabi jaanta hai

tasalli sahaaron ki pahchanta hai

na haal aur farda na mazi ka gham hai

na apni KHabar hai na apnon se matlab na ghairon ki parwa

kabhi baiTh kar hoTalon mein ye pita hai coffee

dhuen mein kabhi kho ke ye nachta hai

kabhi ghumta hai ye galiyon mein aawara hairan

baDhae hue baal ruKHsar-o-sar ke

libas-e-barahna badan par sajae

banae hue bhes sanyasiyon ka

ab us ne rakha hai hippy nam apna