hirasat

dhundlā.ī huī shaam thī

alsā.ī huī sī

aur vaqt bhī baasī thā maiñ jab shahr meñ aayā

har shāḳh se lipTe hue sannāTe khaḌe the

dīvāroñ se chipkī huī ḳhāmoshī paḌī thī

rāhoñ meñ nafas koī na parchhā.īñ na saaya

un galiyoñ meñ kūchoñ meñ, añdherā na ujālā

darvāzoñ ke paT band the, ḳhālī the darīche

bas vaqt ke kuchh baasī se TukḌe the, paḌe the

maiñ ghūmtā phirtā thā sar-e-shahr akelā

darvāzoñ pe āvāz lagātā thaa, koī hai?

har moḌ pe ruk jāatā thā shāyad koī aa.e

lekin koī āhaT, koī saaya bhī na aayā

ye shahr achānak hī magar jaag paḌā hai

āvāzeñ hirāsat meñ liye mujh ko khaḌī haiñ

āvāzoñ ke is shahr meñ maiñ qaid paḌā huuñ

dhundlai hui sham thi

alsai hui si

aur waqt bhi basi tha main jab shahr mein aaya

har shaKH se lipTe hue sannaTe khaDe the

diwaron se chipki hui KHamoshi paDi thi

rahon mein nafas koi na parchhain na saya

un galiyon mein kuchon mein, andhera na ujala

darwazon ke paT band the, KHali the dariche

bas waqt ke kuchh basi se TukDe the, paDe the

main ghumta phirta tha sar-e-shahr akela

darwazon pe aawaz lagata tha, koi hai?

har moD pe ruk jaata tha shayad koi aae

lekin koi aahaT, koi saya bhi na aaya

ye shahr achanak hi magar jag paDa hai

aawazen hirasat mein liye mujh ko khaDi hain

aawazon ke is shahr mein main qaid paDa hun