hizyan

almān meñ raat ke is pahar

ek hī kursī par baiThe

ek hī manzar ko ghūrte

jab naukrī par night shift karte

merā sātvāñ ghanTa chal rahā hai

to ba-zāhir sab sākit hai

sukūt meñ hai

magar ba-bātin tumhārī sochoñ kā sayyāl

kisī ghuman gherī kī tarah

mere dil-o-dimāġh ke

sabhī nihāñ-o-ayāñ goshoñ meñ

be-āvāz tūfāñ barpā kiye hue hai

tum jo kosoñ duur

apne atrāf meñ raushnī phūTne kā manzar-nāma

farāmosh kiye

bāhnī jānib khulne vaalī khiḌkī ke saath lage

king size palang par akele so rahe ho

tumheñ kyā ḳhabar

sākit manzaroñ meñ tartīb paane vaale

ḳhāmosh tūfān

kaisī tabāhī kā pesh-ḳhema ho sakte haiñ

tumheñ kyā ḳhabar

rat-jagoñ meñ palne vaale

kaale ishq

kaisī gahrī āñkhoñ kā madfan ho sakte haiñ

merā tum se mohabbat nahīñ junūn kā rishta hai

aur majnūñ kī aah se ḳhud junūn bhī ḳhauf khātā hai

tum jo mere junūñ ko niDar sāhiloñ se ho kar

lalkārte rahte ho

tumheñ kyā ḳhabar

tūfānī rātoñ meñ sāhiloñ se lauTne vaalī sadā.eñ

apnī june se bigḌī huī hālatoñ meñ palaTtī haiñ

kabhī jo tum un ke masḳh-shuda chehroñ par

vahshat kī āḌī-tirchhī satreñ paḌh paao

to ek lā-muḳhtatim be-ḳhvābī ke maraz meñ paḌ jaao

alman mein raat ke is pahar

ek hi kursi par baiThe

ek hi manzar ko ghurte

jab naukri par night shift karte

mera satwan ghanTa chal raha hai

to ba-zahir sab sakit hai

sukut mein hai

magar ba-baatin tumhaari sochon ka sayyal

kisi ghuman gheri ki tarah

mere dil-o-dimagh ke

sabhi nihan-o-ayan goshon mein

be-awaz tufan barpa kiye hue hai

tum jo koson dur

apne atraf mein raushni phuTne ka manzar-nama

faramosh kiye

bahni jaanib khulne wali khiDki ke sath lage

king size palang par akele so rahe ho

tumhein kya KHabar

sakit manzaron mein tartib pane wale

KHamosh tufan

kaisi tabahi ka pesh-KHema ho sakte hain

tumhein kya KHabar

rat-jagon mein palne wale

kale ishq

kaisi gahri aankhon ka madfan ho sakte hain

mera tum se mohabbat nahin junun ka rishta hai

aur majnun ki aah se KHud junun bhi KHauf khata hai

tum jo mere junun ko niDar sahilon se ho kar

lalkarte rahte ho

tumhein kya KHabar

tufani raaton mein sahilon se lauTne wali sadaen

apni june se bigDi hui haalaton mein palaTti hain

kabhi jo tum un ke masKH-shuda chehron par

wahshat ki aaDi-tirchhi satren paDh pao

to ek la-muKHtatim be-KHwabi ke maraz mein paD jao