holi aur hindostan

ik taraf rāhat kā aur farhat kā kaal

ik taraf holī meñ uḌtā hai gulāl

ik taraf yāroñ kī ishrat-koshiyāñ

ik taraf ham aur hāl-e-pur-malāl

ik taraf daur-e-sharāb-ātishīñ

ik taraf talchhaT kā milnā bhī muhāl

dekhte haiñ tujh ko jab uThtī hai huuk

aah ai hindostāñ ai ḳhasta-hāl

rahm ke qābil ye barbādī tirī

diid ke qābil ye terā hai zavāl

kis qadar ḳhūñ-rez hai kitnā qabīh

terī masjid aur mandir kā savāl

uf tire beToñ kī razm-ārā.iyāñ

aah un ke bāhamī jañg-o-jidāl

apne farzandoñ ke ye atvār dekh

dekh ye la.anat ke qābil chāl-Dhāl

kis qadar zillat ke dil-dāda haiñ ye

be-kamālī meñ haiñ kitne bā-kamāl

sīna-e-tahzīb par hai panja-zan

diin ke jhagḌoñ meñ in kā ishti.āl

dāman-e-aḳhlāq par dhabbā hai ek

in kī vahshat-ḳheziyoñ kā ittisāl

ek taraf rahat ka aur farhat ka kal

ek taraf holi mein uDta hai gulal

ek taraf yaron ki ishrat-koshiyan

ek taraf hum aur haal-e-pur-malal

ek taraf daur-e-sharab-atishin

ek taraf talchhaT ka milna bhi muhaal

dekhte hain tujh ko jab uThti hai huk

aah ai hindostan ai KHasta-haal

rahm ke qabil ye barbaadi teri

did ke qabil ye tera hai zawal

kis qadar KHun-rez hai kitna qabih

teri masjid aur mandir ka sawal

uf tere beTon ki razm-araiyan

aah un ke bahami jang-o-jidal

apne farzandon ke ye atwar dekh

dekh ye lanat ke qabil chaal-Dhaal

kis qadar zillat ke dil-dada hain ye

be-kamali mein hain kitne ba-kamal

sina-e-tahzib par hai panja-zan

din ke jhagDon mein in ka ishtial

daman-e-aKHlaq par dhabba hai ek

in ki wahshat-KHeziyon ka ittisal