holi

dil meñ uThtī hai masarrat kī lahar holī meñ

mastiyāñ jhūmtī haiñ shām-o-sahar holī meñ

saare aalam kī fazā gūñjtī hai naġhmoñ se

kaif-o-mastī ke baraste haiñ guhar holī meñ

dushman aur dost sabhī malte haiñ aapas meñ gulāl

saare be-kār hue teġh-o-tabar holī meñ

mohtasib mast hai aur hazrat-e-vā.is sarshār

mai-kada ban gayā hai aish-nagar holī meñ

kis kī maḳhmūr nigāhoñ ne pilā.e sāġhar

mast-o-be-ḳhud hue sab ahl-e-nazar holī meñ

aaj cupid bhī liye hāthoñ meñ pichkārī hai

us se bach kar bhalā jāoge kidhar holī meñ

ḳhum ke ḳhum tū bhī lunḌhāne kī qasam khā le aaj

dekh zāhid kahīñ rakhiyo na kasar holī meñ

tū samajhtā hai ki hai tū hī nirālā zāhid

are aate haiñ yahāñ tere ḳhusar holī meñ

kapḌe lat-pat kiye kīchaḌ meñ chale aate haiñ

shaiḳh-sāhab ke pisar laḳht-e-jigar holī meñ

būḌhe būḌhe bhī khaḌe takte haiñ lakḌī Tiike

band haiñ rāste aur rāhguzar holī meñ

aur bastī nahīñ ye hind hai sun khol ke kaan

bach ke chalte haiñ yahāñ ḳhvāja ḳhizar holī meñ

mai-kada hai yahāñ sāmān-e-masarrat haiñ 'zarīf'

aa bhī jaao miyāñ be-ḳhauf-o-ḳhatar holī meñ

dil mein uThti hai masarrat ki lahar holi mein

mastiyan jhumti hain sham-o-sahar holi mein

sare aalam ki faza gunjti hai naghmon se

kaif-o-masti ke baraste hain guhar holi mein

dushman aur dost sabhi malte hain aapas mein gulal

sare be-kar hue tegh-o-tabar holi mein

mohtasib mast hai aur hazrat-e-wais sarshaar

mai-kada ban gaya hai aish-nagar holi mein

kis ki maKHmur nigahon ne pilae saghar

mast-o-be-KHud hue sab ahl-e-nazar holi mein

aaj cupid bhi liye hathon mein pichkari hai

us se bach kar bhala jaoge kidhar holi mein

KHum ke KHum tu bhi lunDhane ki qasam kha le aaj

dekh zahid kahin rakhiyo na kasar holi mein

tu samajhta hai ki hai tu hi nirala zahid

are aate hain yahan tere KHusar holi mein

kapDe lat-pat kiye kichaD mein chale aate hain

shaiKH-sahab ke pisar laKHt-e-jigar holi mein

buDhe buDhe bhi khaDe takte hain lakDi Tike

band hain raste aur rahguzar holi mein

aur basti nahin ye hind hai sun khol ke kan

bach ke chalte hain yahan KHwaja KHizar holi mein

mai-kada hai yahan saman-e-masarrat hain 'zarif'

aa bhi jao miyan be-KHauf-o-KHatar holi mein