holi

kyā ḳhuub aa.ī holī

mastoñ kī niklī Tolī

kyā ḳhush-gavār din hai

ik pur-bahār din hai

uḌtā gulāl dekho

chehre haiñ laal dekho

pichkāriyoñ ke dhāre

ḳhush-rañg haiñ nazāre

jazboñ kī vo ḳhushī hai

rañgoñ meñ jo chhupī hai

rañgoñ se tar badan hai

rañgīn pairahan hai

sab nāch-gā rahe haiñ

ūdham machā rahe haiñ

galiyoñ meñ ghūmte haiñ

mastī meñ jhūmte haiñ

sab TuuT kar haiñ milte

yuuñ mil ke sab hī khilte

duurī na fāsla hai

holī meñ sab ravā hai

niilā harā gulābī

rañg aaj uḌātī bhābī

'rāhul' 'kishor' 'gopī'

kheleñge ham se holī

ghar meñ banā.e sab ne

pakvān mīThe mīThe

tehvār hai nirālā

ulfat meñ sab ko Dhālā

holī ne aa ke phir dī

ta.alīm ektā kī

rut kyā 'farāġh' chhā.ī

gokul kī yaad aa.ī

kya KHub aai holi

maston ki nikli Toli

kya KHush-gawar din hai

ek pur-bahaar din hai

uDta gulal dekho

chehre hain lal dekho

pichkariyon ke dhaare

KHush-rang hain nazare

jazbon ki wo KHushi hai

rangon mein jo chhupi hai

rangon se tar badan hai

rangin pairahan hai

sab nach-ga rahe hain

udham macha rahe hain

galiyon mein ghumte hain

masti mein jhumte hain

sab TuT kar hain milte

yun mil ke sab hi khilte

duri na fasla hai

holi mein sab rawa hai

nila hara gulabi

rang aaj uDati bhabi

'rahul' 'kishor' 'gopi'

khelenge hum se holi

ghar mein banae sab ne

pakwan miThe miThe

tehwar hai nirala

ulfat mein sab ko Dhaala

holi ne aa ke phir di

talim ekta ki

rut kya 'faragh' chhai

gokul ki yaad aai