holi

muḳhtalif rang bikharte haiñ tire āñgan meñ

tere āñgan meñ mahakte haiñ mohabbat ke gulāb

vaqt ke paikar-e-pīrī kā ta.assur ye hai

hai dhanak-rang tirā aaj bhī mas.hūr-e-shabāb

rū-e-sad-rang uḳhuvvat kī sabāhat le kar

be-ġharaz aaya ta.assub ke siyah-ḳhānoñ meñ

raqs kartā hai ḳhushī ban ke har ik samt gulāl

bāda-e-lutf bharī hai tire paimānoñ meñ

holikā jaltī hai jab shahr ke chaurāhoñ par

miT ga.ī jaise burā.ī ye gumāñ hotā hai

ek ik fard ko hotā hai ḳhushī kā ehsās

āḳhir-e-shab jo nigāhoñ meñ dhuāñ hotā hai

ai ki rangīn milan tū hai mohabbat kā payām

muttahid hone kī ik shoḳh alāmat tū hai

yuuñ ba-zāhir to hai ik aam sā tyauhār magar

rūh-e-bhārat ke liye naġhma-e-rāhat tū hai

muKHtalif rang bikharte hain tere aangan mein

tere aangan mein mahakte hain mohabbat ke gulab

waqt ke paikar-e-piri ka tassur ye hai

hai dhanak-rang tera aaj bhi mashur-e-shabab

ru-e-sad-rang uKHuwwat ki sabahat le kar

be-gharaz aaya tassub ke siyah-KHanon mein

raqs karta hai KHushi ban ke har ek samt gulal

baada-e-lutf bhari hai tere paimanon mein

holika jalti hai jab shahr ke chaurahon par

miT gai jaise burai ye guman hota hai

ek ek fard ko hota hai KHushi ka ehsas

aaKHir-e-shab jo nigahon mein dhuan hota hai

ai ki rangin milan tu hai mohabbat ka payam

muttahid hone ki ek shoKH alamat tu hai

yun ba-zahir to hai ek aam sa tyauhaar magar

ruh-e-bhaarat ke liye naghma-e-rahat tu hai