holi

pahle zamāna aur thā mai aur thī daur aur thā

vo boliyāñ hī aur thiiñ vo Toliyāñ hī aur thīñ, vo holiyāñ hī aur thiiñ

lekin mire pīr-e-muġhāñ

kal to nayā andāz thā

ik daur kā thā ḳhātma ik daur kā āġhāz thā

tere vafādāroñ ne jab khelīñ gulābī holiyāñ

nikle banā kar Toliyāñ

hañste chale gaate chale

apne gulābī rañg se duniyā ko nahlāte chale

masjid se muñh moḌe hue

mandir kā sañg-e-āstāñ chhoḌe hue

girjā se katrā.e hue

jaise ki hoñ rūhāniyat kī zindagānī hī se ghabrā.e hue

daur-e-vafādārī kā ye anjām thā

fikr-e-gunahgārī kā taaza dil-rubā paiġhām thā

tere hī kūche meñ ye sab ahd-e-vafā toḌe ga.e

rishte na.e joḌe ga.e

aur phir gunahgāroñ ne kyā rindāna hañgāme kiye

us vaqt un ko yaad thā bas ek tarsānā tirā

muflisoñ nādāroñ ko lalchānā tirā

jab mai-kade kī god meñ

tere jafā terī sazā ke naam par sāġhar chale

sūkhe hue kaase labālab bhar chale

sab apne lab tar kar chale

phir toḌ diiñ vo pyāliyāñ jin meñ sadā pī aa.e the

shīshe chhanā chhan chhan chhanā chhan TūTte

aur riñd lazzat lūTte

TuuTe hue shīshoñ kā ik ambār thā

shīshoñ ke is ambār meñ ik vo bhī kohna jaam thā

jis ko sikandar ke qavī haikal javāñ

bhāge the poras kī zamīñ ko chhoḌ kar

un meñ vo kaase bhī to haiñ jin ko arab le aa.e the

apnī abā se Dhāñp kar

piine se pahle dekhte the mohtasib ko jhāñk kar

lekin kabhī

piine se baaz aate na the fāteh jo the

un meñ haiñ aise jaam bhī

jin par paThānoñ ke qavī hāthoñ ke dhuñdle se nishāñ

kuchh aaj bhī maujūd haiñ

aur un nishānoñ meñ hai ḳhuuñ maftūh hindustān kā

aur un meñ haiñ vo jaam bhī jin ko muġhal le aa.e the

tātār se qandhār se kābul se ruknā-bād se

maftūh hindustān meñ

jin ko vo apne qasr-e-ālīshāñ meñ chhalkāte rahe

teġhoñ se khankāte rahe

aur vo hasīñ nāzuk subuk halkī surāhī kis kī hai

paris ke mai-ḳhānoñ meñ ye mash.hūr thī

laayā thā ik tājir ise jo ba.ad meñ fāteh banā

ye halke shīshoñ ke gilās aur ye na.e halke se paig

jin par likhā hai ye bane the mulk-e-inglistān meñ

aur haal kī sadiyoñ meñ chalte rahe

piine ko mil jaatī thī pī lete the ham

lekin tahī-dastī kā ye aalam thā dil jalte rahe

ham aaj ghabrā hī ga.e

aur un sabhī shīshoñ ko chaknāchūr kar Daalā vufūr-e-josh meñ

chhan chhan chhanā chhan toḌ kar

jaise ki barbādī kī devī chham-chhamā-chham nāchtī

holī manāne ke liye mai-ḳhāne meñ aa hī ga.e

TuuTe hue shīshoñ ke is ambār par

ham ne jalā.ī aag yuuñ

zardusht kā pākīza dil sachchā.iyoñ par hañs diyā

jaise ki ye kahne lagā

jalne do jalne do yūñhī shīshe pighalne do yūñhī

tere vafādāroñ ne yuuñ pīr-e-muġhāñ

shab bhar jalā.īñ holiyāñ

na.are vo mastāne lage is josh meñ

dil gir paḌe ehsās kī āġhosh meñ

aur bol uThe taslīm ai pīr-e-muġhāñ jaate haiñ ham

kal phir palaT kar ā.eñge

us vaqt is mai-ḳhāne meñ sāmān hoñge dūsre

tere purāne zehn ke me.aar toḌe jā.eñge

tāmīr-e-nau kī jā.egī

lekin hamāre sāl-ḳhūrda mehrbāñ pīr-e-muġhāñ

tujh ko burā lagtā hai kyuuñ

ġhairoñ kā kyā terā bhī kyā

ye mai-kada ham sab kā hai panchāytī

tū kyā hai terā ḳhauf kyā

kah to diyā pīr-e-muġhāñ kal palaT kar ā.eñge

hargiz na ham baaz ā.eñge

kis ko Darātā hai ki tum is kī sazā pā jāoge

gaate the ham gaate haiñ ham gā.eñge ham

hargiz na baaz ā.eñge ham

jheleñge jiite jā.eñge

pairoñ meñ hai zanjīr lekin TuuT bhī saktī hai ye

haañ aaj hastī qaid hai kal chhūT bhī saktī hai ye

gaane de gaane de hameñ

dhūmeñ machāne de hameñ

shīshe ko shīshe se laḌāne de hameñ

chhan-chhan-chhanā-chhan kī sadā

baḌhne de baḌhne de abhī

ham mast o be-ḳhud nāchte gaate jalāte toḌte

hañste raheñ chalte raheñ

aur tū bhī ḳhud pīr-e-muġhāñ

holī ke naġhme san zarā aur dekh apnī aañkh se

tere vafādāroñ ne kyā khelīñ gulābī holiyāñ

muñh mai-kade se moḌ kar holī kī ye Tolī chalī

gulzār meñ

sabze lachaktī Dāliyāñ gunjān, sundar jhāḌiyāñ

paanī kī sīñchī kiyāriyāñ, kāñToñ meñ chubhtī pattiyāñ

ye sab sahī lekin yahāñ vo shai kahāñ

jis ke liye mash.hūr hai añgūr-e-nāb

haañ kyā kahā pīr-e-muġhāñ

talvoñ ke nīche phuul haiñ in meñ se do ik chun bhī luuñ

ḳhālī haiñ gul-daste tire

tujh ko nahīñ ma.alūm abhī

ḳhālī ye gul-daste tire ḳhālī hī rah jā.eñge ab

phūloñ ne Thānī hai ki shāḳhoñ hī pe mar jā.eñge ab

aur tere kamroñ meñ vo na ā.eñge ab

muñh-band kaliyāñ ab kahāñ

jo apnī sundar mohnī muskān kar deñ rā.egāñ

aur apnā gulshan chhoḌ deñ siine meñ ḳhushbueñ liye

aur ajnabī māhaul meñ

tāq-e-nazar kī kāñptī zīnat baneñ

kaliyoñ ke muñh ab khul chuke muñh-band kaliyāñ ab kahāñ

kaliyāñ kahāñ ye phuul haiñ

ḳhāk-e-chaman kī god meñ ārām-e-jāñ ye phuul haiñ

ātish-zabāñ ye phuul haiñ

aur dekh tū ye phuul kitne shoḳh haiñ

jo TuuT kar shāḳhoñ se gir jaate haiñ terī raah meñ

ai dil-kash pīr-e-muġhāñ

ye chāhte haiñ rok deñ gulzār meñ rāheñ tirī

tere liye chāra hī kiyā ab rah gayā

in be-hayā phūloñ kī āñkhoñ kā to paanī bah gayā

ab haiñ ye un kī jur.ateñ rokeñgi tere rāste

tū bhī ḳhudā ke vāste

in ko kuchal de piis de

varna ḳhudā-na-ḳhvāsta

ye rok hī leñ rāsta

kaliyāñ nahīñ kāñTe haiñ ye

kāñToñ se bhī bad-tar haiñ ye nashtar haiñ ye ḳhanjar haiñ ye

gulzār meñ tere qadam kuchh aaj to aa.e nahīñ

tū ne unhīñ sabzoñ pe kī hai mai-kashī

sadiyoñ se terā daur hai

gulzār par hai haq tirā

tū Dar gayā pīr-e-muġhāñ

kitnā bhayānak ḳhvāb thā

ta.abīr kuchh bhī ho magar

tere vafādāroñ ne kal

kis aan se kis baan se kis shaan se

khelīñ gulābī holiyāñ

pahle zamana aur tha mai aur thi daur aur tha

wo boliyan hi aur thin wo Toliyan hi aur thin, wo holiyan hi aur thin

lekin mere pir-e-mughan

kal to naya andaz tha

ek daur ka tha KHatma ek daur ka aaghaz tha

tere wafadaron ne jab khelin gulabi holiyan

nikle bana kar Toliyan

hanste chale gate chale

apne gulabi rang se duniya ko nahlate chale

masjid se munh moDe hue

mandir ka sang-e-astan chhoDe hue

girja se katrae hue

jaise ki hon ruhaniyat ki zindagani hi se ghabrae hue

daur-e-wafadari ka ye anjam tha

fikr-e-gunahgari ka taza dil-ruba paigham tha

tere hi kuche mein ye sab ahd-e-wafa toDe gae

rishte nae joDe gae

aur phir gunahgaron ne kya rindana hangame kiye

us waqt un ko yaad tha bas ek tarsana tera

muflison nadaron ko lalchana tera

jab mai-kade ki god mein

tere jafa teri saza ke nam par saghar chale

sukhe hue kase labaalab bhar chale

sab apne lab tar kar chale

phir toD din wo pyaliyan jin mein sada pi aae the

shishe chhana chhan chhan chhana chhan TuTte

aur rind lazzat luTte

TuTe hue shishon ka ek ambar tha

shishon ke is ambar mein ek wo bhi kohna jam tha

jis ko sikandar ke qawi haikal jawan

bhage the poras ki zamin ko chhoD kar

un mein wo kase bhi to hain jin ko arab le aae the

apni aba se Dhanp kar

pine se pahle dekhte the mohtasib ko jhank kar

lekin kabhi

pine se baz aate na the fateh jo the

un mein hain aise jam bhi

jin par paThanon ke qawi hathon ke dhundle se nishan

kuchh aaj bhi maujud hain

aur un nishanon mein hai KHun maftuh hindustan ka

aur un mein hain wo jam bhi jin ko mughal le aae the

tatar se qandhaar se kabul se rukna-baad se

maftuh hindustan mein

jin ko wo apne qasr-e-alishan mein chhalkate rahe

teghon se khankate rahe

aur wo hasin nazuk subuk halki surahi kis ki hai

paris ke mai-KHanon mein ye mashhur thi

laya tha ek tajir ise jo baad mein fateh bana

ye halke shishon ke gilas aur ye nae halke se paig

jin par likha hai ye bane the mulk-e-inglistan mein

aur haal ki sadiyon mein chalte rahe

pine ko mil jati thi pi lete the hum

lekin tahi-dasti ka ye aalam tha dil jalte rahe

hum aaj ghabra hi gae

aur un sabhi shishon ko chaknachur kar Dala wufur-e-josh mein

chhan chhan chhana chhan toD kar

jaise ki barbaadi ki dewi chham-chhama-chham nachti

holi manane ke liye mai-KHane mein aa hi gae

TuTe hue shishon ke is ambar par

hum ne jalai aag yun

zardusht ka pakiza dil sachchaiyon par hans diya

jaise ki ye kahne laga

jalne do jalne do yunhi shishe pighalne do yunhi

tere wafadaron ne yun pir-e-mughan

shab bhar jalain holiyan

nare wo mastane lage is josh mein

dil gir paDe ehsas ki aaghosh mein

aur bol uThe taslim ai pir-e-mughan jate hain hum

kal phir palaT kar aaenge

us waqt is mai-KHane mein saman honge dusre

tere purane zehn ke mear toDe jaenge

tamir-e-nau ki jaegi

lekin hamare sal-KHurda mehrban pir-e-mughan

tujh ko bura lagta hai kyun

ghairon ka kya tera bhi kya

ye mai-kada hum sab ka hai panchayti

tu kya hai tera KHauf kya

kah to diya pir-e-mughan kal palaT kar aaenge

hargiz na hum baz aaenge

kis ko Daraata hai ki tum is ki saza pa jaoge

gate the hum gate hain hum gaenge hum

hargiz na baz aaenge hum

jhelenge jite jaenge

pairon mein hai zanjir lekin TuT bhi sakti hai ye

han aaj hasti qaid hai kal chhuT bhi sakti hai ye

gane de gane de hamein

dhumen machane de hamein

shishe ko shishe se laDane de hamein

chhan-chhan-chhana-chhan ki sada

baDhne de baDhne de abhi

hum mast o be-KHud nachte gate jalate toDte

hanste rahen chalte rahen

aur tu bhi KHud pir-e-mughan

holi ke naghme san zara aur dekh apni aankh se

tere wafadaron ne kya khelin gulabi holiyan

munh mai-kade se moD kar holi ki ye Toli chali

gulzar mein

sabze lachakti Daliyan gunjaan, sundar jhaDiyan

pani ki sinchi kiyariyan, kanTon mein chubhti pattiyan

ye sab sahi lekin yahan wo shai kahan

jis ke liye mashhur hai angur-e-nab

han kya kaha pir-e-mughan

talwon ke niche phul hain in mein se do ek chun bhi lun

KHali hain gul-daste tere

tujh ko nahin malum abhi

KHali ye gul-daste tere KHali hi rah jaenge ab

phulon ne Thani hai ki shaKHon hi pe mar jaenge ab

aur tere kamron mein wo na aaenge ab

munh-band kaliyan ab kahan

jo apni sundar mohni muskan kar den raegan

aur apna gulshan chhoD den sine mein KHushbuen liye

aur ajnabi mahaul mein

taq-e-nazar ki kanpti zinat banen

kaliyon ke munh ab khul chuke munh-band kaliyan ab kahan

kaliyan kahan ye phul hain

KHak-e-chaman ki god mein aaram-e-jaan ye phul hain

aatish-zaban ye phul hain

aur dekh tu ye phul kitne shoKH hain

jo TuT kar shaKHon se gir jate hain teri rah mein

ai dil-kash pir-e-mughan

ye chahte hain rok den gulzar mein rahen teri

tere liye chaara hi kiya ab rah gaya

in be-haya phulon ki aankhon ka to pani bah gaya

ab hain ye un ki juraten rokengi tere raste

tu bhi KHuda ke waste

in ko kuchal de pis de

warna KHuda-na-KHwasta

ye rok hi len rasta

kaliyan nahin kanTe hain ye

kanTon se bhi bad-tar hain ye nashtar hain ye KHanjar hain ye

gulzar mein tere qadam kuchh aaj to aae nahin

tu ne unhin sabzon pe ki hai mai-kashi

sadiyon se tera daur hai

gulzar par hai haq tera

tu Dar gaya pir-e-mughan

kitna bhayanak KHwab tha

tabir kuchh bhi ho magar

tere wafadaron ne kal

kis aan se kis ban se kis shan se

khelin gulabi holiyan