holi

fasl-e-bahār aa.ī hai holī ke ruup meñ

sola-siñghār laa.ī hai holī ke ruup meñ

rāheñ paTī huī haiñ abīr-o-gulāl se

haq kī savārī aa.ī hai holī ke ruup meñ

pichkāriyāñ liye hue devī nashāt kī

har ghar meñ aaj aa.ī hai holī ke ruup meñ

sindūr hai ik haat meñ ik haat meñ gulāl

taqdīr muskurā.ī hai holī ke ruup meñ

vo ham se mujtanib nahīñ holī ke naam par

ham ne murād paa.ī hai holī ke ruup meñ

holī ne un ko aur bhī dīvāna kar diyā

dīvānoñ kī ban aa.ī hai holī ke ruup meñ

rañgoñ kī lahr lahr meñ pichkāriyāñ liye

qaus-e-quzah ḳhud aa.ī hai holī ke ruup meñ

dekho jise vo ġharq hai rañg-o-surūr meñ

ik maiñ nahīñ ḳhudā.ī hai holī ke ruup meñ

'sāġhar' naved-e-dāvat-e-āb-o-havā liye

bād-e-bahār aa.ī hai holī ke ruup meñ

fasl-e-bahaar aai hai holi ke rup mein

sola-singhaar lai hai holi ke rup mein

rahen paTi hui hain abir-o-gulal se

haq ki sawari aai hai holi ke rup mein

pichkariyan liye hue dewi nashat ki

har ghar mein aaj aai hai holi ke rup mein

sindur hai ek hat mein ek hat mein gulal

taqdir muskurai hai holi ke rup mein

wo hum se mujtanib nahin holi ke nam par

hum ne murad pai hai holi ke rup mein

holi ne un ko aur bhi diwana kar diya

diwanon ki ban aai hai holi ke rup mein

rangon ki lahr lahr mein pichkariyan liye

qaus-e-quzah KHud aai hai holi ke rup mein

dekho jise wo gharq hai rang-o-surur mein

ek main nahin KHudai hai holi ke rup mein

'saghar' nawed-e-dawat-e-ab-o-hawa liye

baad-e-bahaar aai hai holi ke rup mein