holi

har ek phuul huā rañg-bār holī meñ

har ek shāḳh hai sūrat-nigār holī meñ

guloñ se mauj-e-shafaq rañg khelne aa.ī

ajab hai arz-o-samā par bahār holī meñ

vo surḳh-posh gulistāñ meñ rañg khelā hai

gul-o-saman pe hai turfa nikhār holī meñ

har ek chiiz se rañg-e-vafā Tapaktā hai

shahīd-e-ishq kī hai yādgār holī meñ

kuchh is tarah se huī gul pe shabnam-afshānī

qabā-e-gul hai javāhar-nigār holī meñ

jidhar nigāh uThī surḳhiyāñ nazar aa.iiñ

har ek shai hai fasāna-nigār holī meñ

hai kā.enāt meñ josh-e-numū kī jumbish se

har ek zarre kā dil be-qarār holī meñ

qadam ke nīche hai farsh-e-zamurradīñ 'ra.anā'

hai sar pe sāya-e-abr-e-bahār holī meñ

har ek phul hua rang-bar holi mein

har ek shaKH hai surat-nigar holi mein

gulon se mauj-e-shafaq rang khelne aai

ajab hai arz-o-sama par bahaar holi mein

wo surKH-posh gulistan mein rang khela hai

gul-o-saman pe hai turfa nikhaar holi mein

har ek chiz se rang-e-wafa Tapakta hai

shahid-e-ishq ki hai yaadgar holi mein

kuchh is tarah se hui gul pe shabnam-afshani

qaba-e-gul hai jawahar-nigar holi mein

jidhar nigah uThi surKHiyan nazar aain

har ek shai hai fasana-nigar holi mein

hai kaenat mein josh-e-numu ki jumbish se

har ek zarre ka dil be-qarar holi mein

qadam ke niche hai farsh-e-zamurradin 'rana'

hai sar pe saya-e-abr-e-bahaar holi mein