hona sab se baDa uljhawa hai

honā sab se baḌā uljhāvā hai

shāḳh-e-sanobar chāñd kī aas meñ jāgtī hai

aur din-bhar sone vaale ghar kī dahlīzoñ par aa kar baiThte haiñ

aur ḳhvāhish-o-ḳhvāb ke andeshoñ meñ raat

simaTte pairāhan kī lazzat ban kar rauzan-e-dar se jhāñktī hai

bachche maaoñ kī gardan meñ bāñheñ Daale sote haiñ

ḳhvāb hamārī maa.eñ haiñ

ḳhvāb hamārī maa.eñ haiñ

aur raah kināre baiThe laḌke ghar ko jaane vaalā sab se lambā raste chunte haiñ

shādābī is shahr meñ ik din aa.ī thī

shādābī har shahr meñ ik din aatī hai

aur har shahr ke ik goshe meñ sannāTe kī chādar taane

ek akelā ghar sotā hai

baarī baarī ek ik aane vaalā

ek na ik din us ghar meñ aatā hai

shādābī us shahr meñ ik din aa.ī thī

us din shahr-e-panāh meñ sab se pahlā aane vaalā maiñ thā

aur chāñd samān jhalājhal chehre fānūsoñ kā saut bane the

chāñd akelā ghar

so ik din har jaane vaalā us ghar meñ jaatā hai

maa.eñ apne bachchoñ ko us ghar meñ jā kar jantī haiñ

bahneñ Dhol suhāg alaap ke rotī haiñ

aur beTe

saaz sajā.e maidānoñ meñ ghoḌe dauḌāte haiñ

ḳhemoñ meñ har raat alaav jalā.e jaate haiñ

aur zaḳhmī jism ko dāġhā jaatā hai

aur marne vāloñ kī fihrist banā.ī jaatī hai

ḳhvāhish ḳhvāb andeshe ḳhauf

kabhī na thakne vaale payāde

ham maidānī log

so ik din har jaane vaalā us ghar meñ jaatā hai

is ke ba.ad jo hai vo shahr-e-panāh meñ aane kā pachhtāvā hai

honā sab se baḌā uljhāva hai

hona sab se baDa uljhawa hai

shaKH-e-sanobar chand ki aas mein jagti hai

aur din-bhar sone wale ghar ki dahlizon par aa kar baiThte hain

aur KHwahish-o-KHwab ke andeshon mein raat

simaTte pairahan ki lazzat ban kar rauzan-e-dar se jhankti hai

bachche maon ki gardan mein banhen Dale sote hain

KHwab hamari maen hain

KHwab hamari maen hain

aur rah kinare baiThe laDke ghar ko jaane wala sab se lamba raste chunte hain

shadabi is shahr mein ek din aai thi

shadabi har shahr mein ek din aati hai

aur har shahr ke ek goshe mein sannaTe ki chadar tane

ek akela ghar sota hai

bari bari ek ek aane wala

ek na ek din us ghar mein aata hai

shadabi us shahr mein ek din aai thi

us din shahr-e-panah mein sab se pahla aane wala main tha

aur chand saman jhalajhal chehre fanuson ka saut bane the

chand akela ghar

so ek din har jaane wala us ghar mein jata hai

maen apne bachchon ko us ghar mein ja kar janti hain

bahnen Dhol suhag alap ke roti hain

aur beTe

saz sajae maidanon mein ghoDe dauDate hain

KHemon mein har raat alaw jalae jate hain

aur zaKHmi jism ko dagha jata hai

aur marne walon ki fihrist banai jati hai

KHwahish KHwab andeshe KHauf

kabhi na thakne wale payaade

hum maidani log

so ek din har jaane wala us ghar mein jata hai

is ke baad jo hai wo shahr-e-panah mein aane ka pachhtawa hai

hona sab se baDa uljhawa hai