hunuz yaad hai

zahe-nashāt zahe-husn iztirāb tirā

nazar kī chheḌ se bajtā thā jab rabāb tirā

na ab vo kaif kī rāteñ na vo bahār ke din

ki mahv-e-nāz na thā husn-e-lā-javāb tirā

dam-e-vidā.a vo rañgīñ udāsiyāñ terī

hunūz yaad hai vo dīda-e-pur-āb tirā

vo jhuum jhuum ke abr-e-bahār kā aanā

vo bijliyoñ kī taḌap aur vo iztirāb tirā

vo ibtidā-e-mohabbat vo chāñdnī rāteñ

vo sehn-e-bāġh meñ hañstā huā shabāb tirā

sambhal sambhal ke mirī samt vo nigāh tirī

bachā bachā ke nazar mujh se vo ḳhitāb tirā

mirā harīm-e-tamannā thā āsmāñ se buland

is āsmāñ pe chamaktā thā āftāb tirā

abhī nazar meñ hai rāz-o-niyāz kā aalam

vo merī ijz-e-mohabbat vo pech-o-tāb tirā

kabhī sitam ke liye aur kabhī karam ke liye

nigāh-e-shoḳh meñ Duubā huā hijāb tirā

mirā savāl ba-qadr-e-hujūm-e-shauq-e-nihāñ

hayā kī aaḌ meñ chhuptā huā javāb tirā

hanūz yaad hai 'jauhar' ko ai nigār-e-jamīl

vo iltifāt ke parde meñ ijtināb tirā

zahe-nashat zahe-husn iztirab tera

nazar ki chheD se bajta tha jab rabab tera

na ab wo kaif ki raaten na wo bahaar ke din

ki mahw-e-naz na tha husn-e-la-jawab tera

dam-e-widaa wo rangin udasiyan teri

hunuz yaad hai wo dida-e-pur-ab tera

wo jhum jhum ke abr-e-bahaar ka aana

wo bijliyon ki taDap aur wo iztirab tera

wo ibtida-e-mohabbat wo chandni raaten

wo sehn-e-bagh mein hansta hua shabab tera

sambhal sambhal ke meri samt wo nigah teri

bacha bacha ke nazar mujh se wo KHitab tera

mera harim-e-tamanna tha aasman se buland

is aasman pe chamakta tha aaftab tera

abhi nazar mein hai raaz-o-niyaz ka aalam

wo meri ijz-e-mohabbat wo pech-o-tab tera

kabhi sitam ke liye aur kabhi karam ke liye

nigah-e-shoKH mein Duba hua hijab tera

mera sawal ba-qadr-e-hujum-e-shauq-e-nihan

haya ki aaD mein chhupta hua jawab tera

hanuz yaad hai 'jauhar' ko ai nigar-e-jamil

wo iltifat ke parde mein ijtinab tera