huruf o alfaz ke zaKHire

hurūf o alfāz ke zaḳhīre

yahī haiñ vo dā.ere

ki jin meñ asiir tum bhī ho aur maiñ bhī

tumhārā jo naam

chand harfoñ se mil ke bantā hai

chāhe mafhūm us kā kuchh bhī ho

chāhe mafhūm se vo ḳhālī ho

chāhe us kaifiyat ke bar-aks ho

jo tum meñ numūd paatī hai

aisī ik ruuh

jo kisī jism meñ

kisī ā.īna meñ utrī ho

ek paikar meñ Dhal ga.ī ho

mirā bhī ik naam hai

usī naam se log mujhe jānte haiñ

ye naam bhī

chand alfāz ko milāne se ban gayā hai

ab is kā kiyā zikr mujh pe ye kitnā saj rahā hai

to kyā hamārā tumhārā sambandh itnā hī hai

ki chand alfāz

chand alfāz se mil rahe haiñ

magar isī naam ke to kuchh aur log hoñge

agar na hoñge to kal isī naam ke aur ka.ī log hoñge

agar hamārā vajūd in se kuchh māvarā hai

hurūf o alfāz se sivā hai

to us ke iz.hār kā aur Dhañg kyā hai

huruf o alfaz ke zaKHire

yahi hain wo daere

ki jin mein asir tum bhi ho aur main bhi

tumhaara jo nam

chand harfon se mil ke banta hai

chahe mafhum us ka kuchh bhi ho

chahe mafhum se wo KHali ho

chahe us kaifiyat ke bar-aks ho

jo tum mein numud pati hai

aisi ek ruh

jo kisi jism mein

kisi aaina mein utri ho

ek paikar mein Dhal gai ho

mera bhi ek nam hai

usi nam se log mujhe jaante hain

ye nam bhi

chand alfaz ko milane se ban gaya hai

ab is ka kiya zikr mujh pe ye kitna saj raha hai

to kya hamara tumhaara sambandh itna hi hai

ki chand alfaz

chand alfaz se mil rahe hain

magar isi nam ke to kuchh aur log honge

agar na honge to kal isi nam ke aur kai log honge

agar hamara wajud in se kuchh mawara hai

huruf o alfaz se siwa hai

to us ke izhaar ka aur Dhang kya hai