husn aur mazduri

ek doshīza saḌak par dhuup meñ hai be-qarār

chūḌiyāñ bajtī haiñ kañkar kūTne meñ baar baar

chūḌiyoñ ke saaz meñ ye soz hai kaisā bharā

aañkh meñ aañsū banī jaatī hai jis kī har sadā

gard hai ruḳhsār par zulfeñ aTī haiñ ḳhaak meñ

nāzukī bal khā rahī hai dīda-e-ġhamnāk meñ

ho rahā hai jazb mahr-e-ḳhūñ-chakāñ ke rū-ba-rū

kañkaroñ kī nabz meñ uThtī javānī kā lahū

dhuup meñ lahrā rahī hai kākul-e-ambar-sarisht

ho rahā hai kam-sinī kā loch juzv-e-sañg-o-ḳhisht

pī rahī haiñ surḳh kirneñ mahr-e-ātish-bār kī

nargisī āñkhoñ kā ras mai champa.ī ruḳhsār kī

ġham ke bādal ḳhātir-e-nāzuk pe haiñ chhā.e hue

āriz-e-rañgīñ haiñ yā do phuul murjhā.e hue

chīthaḌoñ meñ dīdanī hai rū-e-ġhamgīn-e-shabāb

abr ke āvāra TukḌoñ meñ ho jaise māhtāb

uf ye nādārī mire siine se uThtā hai dhuāñ

aah ai aflās ke maare hue hindostāñ!

husn ho majbūr kañkar toḌne ke vāste

dast-e-nāzuk aur patthar toḌne ke vāste

fikr se jhuk jaa.e vo gardan tuf ai lail o nahār

jis meñ honā chāhiye phūloñ kā ik halkā sā haar

āsmāñ jān-e-tarab ko vaqf-e-rañjūrī kare

sinf-e-nāzuk bhuuk se tañg aa ke mazdūrī kare

us jabīñ par aur pasīna ho jhalakne ke liye

jo jabīn-e-nāz ho afshāñ chhiḌakne ke liye

bhiik meñ vo haath uTTheñ iltijā ke vāste

jin ko qudarat ne banāyā ho hinā ke vāste

nāzukī se jo uThā saktī na ho kājal kā baar

un subuk palkoñ pe baiThe raah kā bojhal ġhubār

kyuuñ falak majbūr hoñ aañsū bahāne ke liye

añkhḌiyāñ hoñ jo diloñ meñ Duub jaane ke liye

muflisī chhāñTe use qahr-o-ġhazab ke vāste

jis kā mukhḌā ho shabistān-e-tarab ke vāste

fart-e-ḳhushkī se vo lab tarseñ takallum ke liye

jin ko qudarat ne tarāshā ho tabassum ke liye

nāznīnoñ kā ye aalam māthar-e-hind aah aah

kis ke jaur-e-nā-ravā ne kar diyā tujh ko tabāh?

hun barastā thā kabhī din raat terī ḳhaak par

sach batā ai hind tujh ko khā ga.ī kis kī nazar

baaġh terā kyuuñ jahannam kā namūna ho gayā

aah kyuuñ terā bharā darbār suunā ho gayā

sar-barahna kyuuñ hai vo phūloñ kī chādar kyā huī

ai shab-e-tārīk terī bazm-e-aḳhtar kyā huī

jis ke aage thā qamar kā rañg phīkā kyā huā

ai urūs-e-nau tire māthe kā Tiikā kyā huā

ai ḳhudā hindostāñ par ye nahūsat tā-kujā?

āḳhir is jannat pe dozaḳh kī hukūmat tā-kujā?

gardan-e-haq par ḳharāsh-e-teġh-e-bātil tā-ba-kai?

ahl-e-dil ke vāste tauq-o-salāsil tā-ba-kai?

sar-zamīn-e-rañg-o-bū par aks-e-gulḳhan tā-kujā?

paak siitā ke liye zindān-e-rāvan tā-kujā?

dast-e-nāzuk ko rasan se ab chhuḌānā chāhiye

is kalā.ī meñ to kañgan jagmagānā chāhiye

ek doshiza saDak par dhup mein hai be-qarar

chuDiyan bajti hain kankar kuTne mein bar bar

chuDiyon ke saz mein ye soz hai kaisa bhara

aankh mein aansu bani jati hai jis ki har sada

gard hai ruKHsar par zulfen aTi hain KHak mein

nazuki bal kha rahi hai dida-e-ghamnak mein

ho raha hai jazb mahr-e-KHun-chakan ke ru-ba-ru

kankaron ki nabz mein uThti jawani ka lahu

dhup mein lahra rahi hai kakul-e-ambar-sarisht

ho raha hai kam-sini ka loch juzw-e-sang-o-KHisht

pi rahi hain surKH kirnen mahr-e-atish-bar ki

nargisi aankhon ka ras mai champai ruKHsar ki

gham ke baadal KHatir-e-nazuk pe hain chhae hue

aariz-e-rangin hain ya do phul murjhae hue

chithaDon mein didani hai ru-e-ghamgin-e-shabab

abr ke aawara TukDon mein ho jaise mahtab

uf ye nadari mere sine se uThta hai dhuan

aah ai aflas ke mare hue hindostan!

husn ho majbur kankar toDne ke waste

dast-e-nazuk aur patthar toDne ke waste

fikr se jhuk jae wo gardan tuf ai lail o nahaar

jis mein hona chahiye phulon ka ek halka sa haar

aasman jaan-e-tarab ko waqf-e-ranjuri kare

sinf-e-nazuk bhuk se tang aa ke mazduri kare

us jabin par aur pasina ho jhalakne ke liye

jo jabin-e-naz ho afshan chhiDakne ke liye

bhik mein wo hath uTThen iltija ke waste

jin ko qudarat ne banaya ho hina ke waste

nazuki se jo uTha sakti na ho kajal ka bar

un subuk palkon pe baiThe rah ka bojhal ghubar

kyun falak majbur hon aansu bahane ke liye

ankhDiyan hon jo dilon mein Dub jaane ke liye

muflisi chhanTe use qahr-o-ghazab ke waste

jis ka mukhDa ho shabistan-e-tarab ke waste

fart-e-KHushki se wo lab tarsen takallum ke liye

jin ko qudarat ne tarasha ho tabassum ke liye

nazninon ka ye aalam mathar-e-hind aah aah

kis ke jaur-e-na-rawa ne kar diya tujh ko tabah?

hun barasta tha kabhi din raat teri KHak par

sach bata ai hind tujh ko kha gai kis ki nazar

bagh tera kyun jahannam ka namuna ho gaya

aah kyun tera bhara darbar suna ho gaya

sar-barahna kyun hai wo phulon ki chadar kya hui

ai shab-e-tarik teri bazm-e-aKHtar kya hui

jis ke aage tha qamar ka rang phika kya hua

ai urus-e-nau tere mathe ka Tika kya hua

ai KHuda hindostan par ye nahusat ta-kuja?

aaKHir is jannat pe dozaKH ki hukumat ta-kuja?

gardan-e-haq par KHarash-e-tegh-e-baatil ta-ba-kai?

ahl-e-dil ke waste tauq-o-salasil ta-ba-kai?

sar-zamin-e-rang-o-bu par aks-e-gulKHan ta-kuja?

pak sita ke liye zindan-e-rawan ta-kuja?

dast-e-nazuk ko rasan se ab chhuDana chahiye

is kalai mein to kangan jagmagana chahiye