husn-e-amal

aao apne dil meñ dard-e-lā-davā paidā kareñ

shiddat-e-ġham meñ masarrat kā mazā paidā kareñ

TuuT jaa.e jin se taġh.īr-e-zamāna kā fusūñ

vo yaqīñ paidā kareñ vo hausla paidā kareñ

nūr-e-ḳhurshīd-o-surayyā jis se ho jaa.e ḳhajil

zarra-e-nāchīz meñ aisī ziyā paidā kareñ

ḳhud-baḳhud uTh jā.eñgī pābandiyāñ māhaul kī

ik zarā ham jazba-e-vahshat-fazā paidā kareñ

vo jo honā chāhte haiñ zindagī meñ kāmyāb

ishq se nisbat junūñ se vāsta paidā kareñ

ho jinheñ manzūr tasḳhīr-e-jahān-e-rang-o-bū

pahle vo chashm-e-haqīqat-āshnā paidā kareñ

rāz-e-hastī ek din hogā ai 'manshā' be-naqāb

shart ye hai ham nigāh-e-bā-safā paidā kareñ

aao apne dil mein dard-e-la-dawa paida karen

shiddat-e-gham mein masarrat ka maza paida karen

TuT jae jin se taghir-e-zamana ka fusun

wo yaqin paida karen wo hausla paida karen

nur-e-KHurshid-o-surayya jis se ho jae KHajil

zarra-e-nachiz mein aisi ziya paida karen

KHud-baKHud uTh jaengi pabandiyan mahaul ki

ek zara hum jazba-e-wahshat-faza paida karen

wo jo hona chahte hain zindagi mein kaamyab

ishq se nisbat junun se wasta paida karen

ho jinhen manzur tasKHir-e-jahan-e-rang-o-bu

pahle wo chashm-e-haqiqat-ashna paida karen

raaz-e-hasti ek din hoga ai 'mansha' be-naqab

shart ye hai hum nigah-e-ba-safa paida karen