husn-e-sar-e-rah

guzar rahā hai idhar se to muskurātā jā

khile nahīñ haiñ jo ġhunche unheñ khilātā jā

tujhe qasam hai sukūñ-āzmā nigāhoñ kī

kisī ġharīb kī taqdīr ko jagātā jā

vahī nigāh vahī ik tabassum-e-rangīñ

charāġh-e-anjuman-e-yās ko bujhātā jā

junūñ-navāz tirī mast-gāmiyoñ ke nisār

kamand-e-hosh-o-ḳhirad se mujhe chhuḌātā jā

fareb-ḳhurda-e-bazm-e-hayāt huuñ ya.anī

mirī nigāh se ab ye hijāb uThātā jā

uThā ke chehra-e-rangīñ se parda-e-asrār

harīm-e-dil ko phir ik baar jagmagātā jā

guzar raha hai idhar se to muskuraata ja

khile nahin hain jo ghunche unhen khilata ja

tujhe qasam hai sukun-azma nigahon ki

kisi gharib ki taqdir ko jagata ja

wahi nigah wahi ek tabassum-e-rangin

charagh-e-anjuman-e-yas ko bujhata ja

junun-nawaz teri mast-gamiyon ke nisar

kamand-e-hosh-o-KHirad se mujhe chhuData ja

fareb-KHurda-e-bazm-e-hayat hun yani

meri nigah se ab ye hijab uThata ja

uTha ke chehra-e-rangin se parda-e-asrar

harim-e-dil ko phir ek bar jagmagata ja