husn najat-dahinda hai

sirf husn

haañ. sirf husn najāt-dahindā hai

āñkhoñ kā

jo ghaTiyā pinjroñ meñ qaid hai

aur ma.amūlī manāzir meñ mahbūs

kisī galī-saḌī lā-yāniyat kī tarah najis

kisī bhūle hue lafz kī tarah āseb-zada

kyuuñ nahīñ buujh letī aulād-e-ādam

ki khul jā.egā saarā chhupāo

ek haibatnāk ḳhālī Thahrāo meñ

jo ek saffāk bedārī se mohr-band hai

ek madfūn parvāz kī tarah

ek hunūt-shuda ufuq kī tarah

bil-āḳhir hastī kī zād-būm par dhund chhā ga.ī

ab cockroach ġhārat-gar fāteh haiñ

us kā.enāt ke jahāñ vaqt abhī ajnabī nahīñ huā

un kī saltanat meñ tārīḳh mamnua hai

zamāne par ḳharāsh Dāltī ḳhār-dār tuġhyānī

havādis se pare chaltī huī

Takrā rahī hai qadīm chaTTānoñ se

ek bahut hī siyāh raat ke sahme hue sitāre

ek pur-haul fazā meñ saañs letī ḳhāmoshī

jise ham ḳhvāb karnā chāhte haiñ

ḳhvāb jauhar haiñ asiil niiñd kā

insānī āñkhoñ kā

hamāre sayyāre

aur hamāre zamāne itne ḳhallāq nahīñ haiñ

ki banā sakeñ ek sachchī raat

jo sahār sake

abdiyat se tarāshī huī vo tahdār gahrā.ī

jis se taḳhayyul kā qimāsh bunā gayā hai

yaqīnan hameñ ek niiñd kī zarūrat hai

kisī asātīrī sitāre kā dabīz kā hī saayā

ġhaibī dhundalke ko sañvārtā ujāltā

ek dil, ek zaḳhm---- banā sakte haiñ dekhe ko an-dekhā

dard kafīl hai ruuh kā

lafz kī bulūġhat tak shole kī puḳhtagī tak

sirf husn

han sirf husn najat-dahinda hai

aankhon ka

jo ghaTiya pinjron mein qaid hai

aur mamuli manazir mein mahbus

kisi gali-saDi la-yaniyat ki tarah najis

kisi bhule hue lafz ki tarah aaseb-zada

kyun nahin bujh leti aulad-e-adam

ki khul jaega sara chhupao

ek haibatnak KHali Thahrao mein

jo ek saffak bedari se mohr-band hai

ek madfun parwaz ki tarah

ek hunut-shuda ufuq ki tarah

bil-aKHir hasti ki zad-bum par dhund chha gai

ab cockroach ghaarat-gar fateh hain

us kaenat ke jahan waqt abhi ajnabi nahin hua

un ki saltanat mein tariKH mamnua hai

zamane par KHarash Dalti KHar-dar tughyani

hawadis se pare chalti hui

Takra rahi hai qadim chaTTanon se

ek bahut hi siyah raat ke sahme hue sitare

ek pur-haul faza mein sans leti KHamoshi

jise hum KHwab karna chahte hain

KHwab jauhar hain asil nind ka

insani aankhon ka

hamare sayyare

aur hamare zamane itne KHallaq nahin hain

ki bana saken ek sachchi raat

jo sahaar sake

abdiyat se tarashi hui wo tahdar gahrai

jis se taKHayyul ka qimash buna gaya hai

yaqinan hamein ek nind ki zarurat hai

kisi asatiri sitare ka dabiz ka hi saya

ghaibi dhundalke ko sanwarta ujalta

ek dil, ek zaKHm---- bana sakte hain dekhe ko an-dekha

dard kafil hai ruh ka

lafz ki bulughat tak shole ki puKHtagi tak