huk

jab kitāboñ ke navishtoñ se phisal kar

mirī darmāñda nigāh

chār-sū phaile hue safha-e-ayyām pe jā paḌtī hai

dil meñ ik huuk sī uThtī hai

ubhar aate haiñ dukhte hue jāñkāh savāl

phir isī huuk ke lahje meñ ḳhudā boltā hai

zindagānī kī kaḌī sharteñ haiñ

ye ibādat hai tumhārī ki mire baḳhshe hue dukh jhelo

in parindoñ kaa, bahā.im kā tasavvuf dekho

kaise minqār-shikasta taa.ir

daane daane ko taras jaatā hai dānoñ meñ ghirā

musht-e-par ḳhaak meñ Dhal jaatī hai rafta rafta

jaan kho dene ke be-zār irāde ke baġhair

kisī shikve ke baġhair''

aur ye mujh se baḌā dars samajh meñ nahīñ aatā merī

kis liye us kī mashiyyat ne kiyā dukh paidā

sochtā huuñ to Dhalak aate haiñ ashkoñ meñ savāl

hai mirī soch mire apne liye ek azaab

us pe aa.ed hī nahīñ mere savāloñ kā javāb

jab kitabon ke nawishton se phisal kar

meri darmanda nigah

chaar-su phaile hue safha-e-ayyam pe ja paDti hai

dil mein ek huk si uThti hai

ubhar aate hain dukhte hue jaankah sawal

phir isi huk ke lahje mein KHuda bolta hai

zindagani ki kaDi sharten hain

ye ibaadat hai tumhaari ki mere baKHshe hue dukh jhelo

in parindon ka, bahaim ka tasawwuf dekho

kaise minqar-shikasta tair

dane dane ko taras jata hai danon mein ghira

musht-e-par KHak mein Dhal jati hai rafta rafta

jaan kho dene ke be-zar irade ke baghair

kisi shikwe ke baghair

aur ye mujh se baDa dars samajh mein nahin aata meri

kis liye us ki mashiyyat ne kiya dukh paida

sochta hun to Dhalak aate hain ashkon mein sawal

hai meri soch mere apne liye ek azab

us pe aaed hi nahin mere sawalon ka jawab