Hyderabad

jagmagātī huī yādoñ ke hasīn āñchal meñ

aaj phir qāfila-e-sub.h-o-masā Thahrā hai

shahr ke dil ke dhaḌakne kī sadā tez hui

pyaar kī chhāñv meñ ik giit ne lī añgḌā.ī

daur-e-tārīḳh kī betāb guzargāhoñ se

kitne phūloñ kī mahak le ke mohabbat aa.ī

har taraf ab bhī ham-āġhosh hai ta.abīroñ se

ek dildār ke ḳhvāboñ kī javāñ ra.anā.ī

husn ke naam se baaqī hai chamak tāroñ kī

ishq ke paas hai andāz-e-chaman-ārā.ī

terī tahzīb kī rāhoñ meñ luTāne hoñge

dīda-o-dil kī umangoñ ne ḳhazāne kitne

in fazāoñ meñ hai ehsās-e-vafā kī ḳhushbū

ye dar-o-bām sunāte haiñ fasāne kitne

tere māthe pe hai almās-o-guhar kī tābish

tere hoñToñ pe haiñ bedār tarāne kitne

terī shādāb bahāroñ se gale milte haiñ

zindagānī ke ujāloñ meñ zamāne kitne

jagmagātī huī yādoñ ke hasīñ āñchal meñ

aaj phir qāfila-e-sub.h-o-masā Thahrā hai

jagmagati hui yaadon ke hasin aanchal mein

aaj phir qafila-e-subh-o-masa Thahra hai

shahr ke dil ke dhaDakne ki sada tez hui

pyar ki chhanw mein ek git ne li angDai

daur-e-tariKH ki betab guzargahon se

kitne phulon ki mahak le ke mohabbat aai

har taraf ab bhi ham-aghosh hai tabiron se

ek dildar ke KHwabon ki jawan ranai

husn ke nam se baqi hai chamak taron ki

ishq ke pas hai andaz-e-chaman-arai

teri tahzib ki rahon mein luTane honge

dida-o-dil ki umangon ne KHazane kitne

in fazaon mein hai ehsas-e-wafa ki KHushbu

ye dar-o-baam sunate hain fasane kitne

tere mathe pe hai almas-o-guhar ki tabish

tere honTon pe hain bedar tarane kitne

teri shadab bahaaron se gale milte hain

zindagani ke ujalon mein zamane kitne

jagmagati hui yaadon ke hasin aanchal mein

aaj phir qafila-e-subh-o-masa Thahra hai