ibaadat ke waqt mein hissa

ibādat meñ

ḳhudā ke vaqt meñ hisse kī ḳhvāhish

na jaane kyuuñ sabhī yādoñ meñ hotī hai

khaḌā rahtā huuñ maiñ bas haath bāñdhe ik kināre se

magar vo qāfila yādoñ kā jaise ḳhatm hone meñ nahīñ aatā

kahāñ sajda karūñ maiñ?

bhuul jaatā huuñ ki raka.at kaun sī hai

musībat hai

gavārā hī nahīñ un ko mirā masjid meñ aanā

mirā jannat meñ jaanā

zarā sī der kī to baat thī

do farz paḌhne the

aur is ke ba.ad maiñ ḳhālī hī ḳhālī thā

magar in hāsidoñ ko kaun samjhā.e

kahīñ ye aaj bhī shāyad

mujhe khone se Dartī haiñ

ibādat se ḳhudā kī

ye jalan mahsūs kartī haiñ

inheñ samjhā.e koī

ibaadat mein

KHuda ke waqt mein hisse ki KHwahish

na jaane kyun sabhi yaadon mein hoti hai

khaDa rahta hun main bas hath bandhe ek kinare se

magar wo qafila yaadon ka jaise KHatm hone mein nahin aata

kahan sajda karun main?

bhul jata hun ki rakat kaun si hai

musibat hai

gawara hi nahin un ko mera masjid mein aana

mera jannat mein jaana

zara si der ki to baat thi

do farz paDhne the

aur is ke baad main KHali hi KHali tha

magar in hasidon ko kaun samjhae

kahin ye aaj bhi shayad

mujhe khone se Darti hain

ibaadat se KHuda ki

ye jalan mahsus karti hain

inhen samjhae koi