iblis ki majlis-e-shura

iblīs

ye anāsir kā purānā khel ye duniyā-e-dūñ

sākinān-e-arsh-e-āzam kī tamannāoñ kā ḳhuuñ

is kī barbādī pe aaj āmāda hai vo kārsāz

jis ne is kā naam rakhā thā jahān-e-kāf-o-nūñ

maiñ ne dikhlāyā farañgī ko mulūkiyat kā ḳhvāb

maiñ ne toḌā masjid-o-dair-o-kalīsā kā fusūñ

maiñ ne nādāroñ ko sikhlāyā sabaq taqdīr kā

maiñ ne mun.im ko diyā sarmāya daarī kā junūñ

kaun kar saktā hai is kī ātish-e-sozāñ ko sard

jis ke hañgāmoñ meñ ho iblīs kā soz-e-darūñ

jis kī shāḳheñ hoñ hamārī ābiyārī se buland

kaun kar saktā hai is naḳhl-e-kuhan ko sar-nigūñ

pahlā mushīr

is meñ kyā shak hai ki mohkam hai ye iblīsī nizām

puḳhta-tar is se hue ḳhū-e-ġhulāmī meñ avaam

hai azal se in ġharīboñ ke muqaddar meñ sujūd

in kī fitrat kā taqāzā hai namāz-e-be-qayām

aarzū avval to paidā ho nahīñ saktī kahīñ

ho kahīñ paidā to mar jaatī hai yā rahtī hai ḳhaam

ye hamārī sa.ī-e-paiham kī karāmat hai ki aaj

sūfī-o-mullā mulūkiyyat ke bande haiñ tamām

tab-e-mashriq ke liye mauzūñ yahī afyūn thī

varna qavvālī se kuchh kam-tar nahīñ ilm-e-kalām

hai tavāf-o-haj kā hañgāma agar baaqī to kyā

kund ho kar rah ga.ī momin kī teġh-e-be-niyām

kis kī nau-mīdī pe hujjat hai ye farmān-e-jadīd

hai jihād is daur meñ mard-e-musalmāñ par harām

dūsrā mushīr

ḳhair hai sulatānī-e-jamhūr kā ġhauġhā ki shar

tū jahāñ ke taaza fitnoñ se nahīñ hai bā-ḳhabar

pahlā mushīr

huuñ magar merī jahāñ-bīnī batātī hai mujhe

jo mulūkiyat kā ik parda ho kyā is se ḳhatar

ham ne ḳhud shāhī ko pahnāyā hai jamhūrī libās

jab zarā aadam huā hai ḳhud-shanās-o-ḳhud-nigar

kārobār-e-shahryārī kī haqīqat aur hai

ye vajūd-e-mīr-o-sultāñ par nahīñ hai munhasir

majlis-e-millat ho yā parvez kā darbār ho

hai vo sultāñ ġhair kī khetī pe ho jis kī nazar

tū ne kyā dekhā nahīñ maġhrib kā jamhūrī nizām

chehra raushan andarūñ chañgez se tārīk-tar

tīsrā mushīr

rūh-e-sultānī rahe baaqī to phir kyā iztirāb

hai magar kyā is yahūdī kī sharārat kā javāb

vo kalīm-e-be-tajallī vo masīh-e-be-salīb

niist paiġhambar va-lekin dar baġhal dārad kitāb

kyā batā.ūñ kyā hai kāfir kī nigāh-e-parda-soz

mashriq-o-maġhrib kī qaumoñ ke liye roz-e-hisāb

is se baḌh kar aur kyā hogā tabī.at kā fasād

toḌ dī bandoñ ne āqāoñ ke ḳhemoñ kī tanāb

chauthā mushīr

toḌ is kā rūmat-ul-kubrā ke aivānoñ meñ dekh

āl-e-ceaser ko dikhāyā ham ne phir ceaser kā ḳhvāb

kaun bahr-e-rūm kī maujoñ se hai lipTā huā

gaah bālad-chūñ-sanobar gaah nālad-chūñ-rubāb

tīsrā mushīr

maiñ to is kī āqibat-bīnī kā kuchh qaa.il nahīñ

jis ne afrañgī siyāsat ko kyā yuuñ be-hijāb

pāñchvāñ mushīr iblīs ko muḳhātab kar ke

ai tire soz-e-nafas se kār-e-ālam ustuvār

tū ne jab chāhā kiyā har pardagī ko āshkār

āb-o-gil terī harārat se jahān-e-soz-o-sāz

ablah-e-jannat tirī ta.alīm se dānā-e-kār

tujh se baḌh kar fitrat-e-ādam kā vo mahram nahīñ

sāda-dil bandoñ meñ jo mash.hūr hai parvardigār

kaam thā jin kā faqat taqdīs-o-tasbīh-o-tavāf

terī ġhairat se abad tak sar-nigūñ-o-sharmsār

garche haiñ tere murīd afrañg ke sāhir tamām

ab mujhe un kī farāsat par nahīñ hai e'tibār

vo yahūdī fitna-gar vo rūh-e-mazdak kā burūz

har qabā hone ko hai is ke junūñ se taar taar

zaaġh dashtī ho rahā hai ham-sar-e-shāhīn-o-charġh

kitnī sur.at se badaltā hai mizāj-e-rozgār

chhā ga.ī āshufta ho kar vus.at-e-aflāk par

jis ko nādānī se ham samjhe the ik musht-e-ġhubār

fitna-e-fardā kī haibat kā ye aalam hai ki aaj

kāñpte haiñ kohsār-o-murġh-zār-o-jūebār

mere aaqā vo jahāñ zer-o-zabar hone ko hai

jis jahāñ kā hai faqat terī siyādat par madār

iblis

ye anasir ka purana khel ye duniya-e-dun

sakinan-e-arsh-e-azam ki tamannaon ka KHun

is ki barbaadi pe aaj aamada hai wo karsaz

jis ne is ka nam rakha tha jahan-e-kaf-o-nun

main ne dikhlaya farangi ko mulukiyat ka KHwab

main ne toDa masjid-o-dair-o-kalisa ka fusun

main ne nadaron ko sikhlaya sabaq taqdir ka

main ne munim ko diya sarmaya dari ka junun

kaun kar sakta hai is ki aatish-e-sozan ko sard

jis ke hangamon mein ho iblis ka soz-e-darun

jis ki shaKHen hon hamari aabiyari se buland

kaun kar sakta hai is naKHl-e-kuhan ko sar-nigun

pahla mushir

is mein kya shak hai ki mohkam hai ye iblisi nizam

puKHta-tar is se hue KHu-e-ghulami mein awam

hai azal se in gharibon ke muqaddar mein sujud

in ki fitrat ka taqaza hai namaz-e-be-qayam

aarzu awwal to paida ho nahin sakti kahin

ho kahin paida to mar jati hai ya rahti hai KHam

ye hamari sai-e-paiham ki karamat hai ki aaj

sufi-o-mulla mulukiyyat ke bande hain tamam

tab-e-mashriq ke liye mauzun yahi afyun thi

warna qawwali se kuchh kam-tar nahin ilm-e-kalam

hai tawaf-o-haj ka hangama agar baqi to kya

kund ho kar rah gai momin ki tegh-e-be-niyam

kis ki nau-midi pe hujjat hai ye farman-e-jadid

hai jihad is daur mein mard-e-musalman par haram

dusra mushir

KHair hai sulatani-e-jamhur ka ghaugha ki shar

tu jahan ke taza fitnon se nahin hai ba-KHabar

pahla mushir

hun magar meri jahan-bini batati hai mujhe

jo mulukiyat ka ek parda ho kya is se KHatar

hum ne KHud shahi ko pahnaya hai jamhuri libas

jab zara aadam hua hai KHud-shanas-o-KHud-nigar

karobar-e-shahryari ki haqiqat aur hai

ye wajud-e-mir-o-sultan par nahin hai munhasir

majlis-e-millat ho ya parwez ka darbar ho

hai wo sultan ghair ki kheti pe ho jis ki nazar

tu ne kya dekha nahin maghrib ka jamhuri nizam

chehra raushan andarun changez se tarik-tar

tisra mushir

ruh-e-sultani rahe baqi to phir kya iztirab

hai magar kya is yahudi ki shararat ka jawab

wo kalim-e-be-tajalli wo masih-e-be-salib

nist paighambar wa-lekin dar baghal darad kitab

kya bataun kya hai kafir ki nigah-e-parda-soz

mashriq-o-maghrib ki qaumon ke liye roz-e-hisab

is se baDh kar aur kya hoga tabiat ka fasad

toD di bandon ne aaqaon ke KHemon ki tanab

chautha mushir

toD is ka rumat-ul-kubra ke aiwanon mein dekh

aal-e-ceaser ko dikhaya hum ne phir ceaser ka KHwab

kaun bahr-e-rum ki maujon se hai lipTa hua

gah baalad-chun-sanobar gah nalad-chun-rubab

tisra mushir

main to is ki aaqibat-bini ka kuchh qail nahin

jis ne afrangi siyasat ko kya yun be-hijab

panchwan mushir iblis ko muKHatab kar ke

ai tere soz-e-nafas se kar-e-alam ustuwar

tu ne jab chaha kiya har pardagi ko aashkar

aab-o-gil teri hararat se jahan-e-soz-o-saz

ablah-e-jannat teri talim se dana-e-kar

tujh se baDh kar fitrat-e-adam ka wo mahram nahin

sada-dil bandon mein jo mashhur hai parwardigar

kaam tha jin ka faqat taqdis-o-tasbih-o-tawaf

teri ghairat se abad tak sar-nigun-o-sharmsar

garche hain tere murid afrang ke sahir tamam

ab mujhe un ki farasat par nahin hai e'tibar

wo yahudi fitna-gar wo ruh-e-mazdak ka buruz

har qaba hone ko hai is ke junun se tar tar

zagh dashti ho raha hai ham-sar-e-shahin-o-chargh

kitni surat se badalta hai mizaj-e-rozgar

chha gai aashufta ho kar wusat-e-aflak par

jis ko nadani se hum samjhe the ek musht-e-ghubar

fitna-e-farda ki haibat ka ye aalam hai ki aaj

kanpte hain kohsar-o-murgh-zar-o-juebar

mere aaqa wo jahan zer-o-zabar hone ko hai

jis jahan ka hai faqat teri siyaadat par madar