ibn-e-adna

koh-e-almās par

mausamoñ aur rangoñ ke jaadū bhare des meñ

ibn-e-adnā ko ik baar phir se bulāyā gayā

ibn-e-adnā ki apne kamāl-e-mahārat meñ be-misl thā

ek amboh us ke fusūñ kī itā'at meñ thā

devtāoñ kā vo lāDlā

qaum kī rahbarī us ke hisse meñ thī

ḳhilqat-e-shahr sab us ke halqe meñ thī

be-zabāñ

ḳhilqat-e-shahr-e-āzurdagāñ

āsmāñ se utārī ga.ī mushkiloñ se nabard-āzmā nīm-jāñ

apnī hālat pe nauha-kunāñ

aur vo

har nafas devtāoñ kī hamd-o-munājāt meñ musta'id

ek nūrānī bahrūp

jis ke tavassul se is shahr-e-zulmāt meñ

mushkiloñ ke ḳhudāoñ kī saarī ḳhudā.ī

bahut shaan se

zindagī ke shajar se ḳharāj-e-musalsal talab kar rahī thī

ibn-e-adnā ne nīchī nigāhoñ se kul devtāoñ ko tā'zīm dī

dil meñ aa.ī ki maiñ markaz-e-tā'at-o-zuhd huuñ

maiñ zamīñ par ḳhudāoñ kā naa.eb huuñ

aur qadr-o-qīmat meñ nāyāb huuñ

ḳhilqat-e-'ām bhī mere jaadū kī muTThī meñ hai

ḳhilqat-e-'ām jis ke lahū aur pasīne se

in mā'badoñ aur mahloñ kī īñToñ kā gaarā banāyā gayā

ek lamhe ko kuchh yaad aayā

magar

is se pahle ki harf-e-talab

aur harf-e-shikāyat kī talḳhī zabāñ-gīr ho

ek aahaT huī

mahzar-e-ḳhās ke dar pe

donoñ taraf

us ke jaise

ka.ī ibn-e-adnā

mahaz ik ishāre pe

ḳhalq-e-ḳhudā ke lahū se

mahallāt ke bām-o-dar pe na.ī naqsh-ārā.ī ke muntazir

dast-basta dikhā.ī diye

aur vo

be-jhijhak sajda-e-shukr meñ gir gayā

koh-e-almas par

mausamon aur rangon ke jadu bhare des mein

ibn-e-adna ko ek bar phir se bulaya gaya

ibn-e-adna ki apne kamal-e-mahaarat mein be-misl tha

ek amboh us ke fusun ki ita'at mein tha

dewtaon ka wo laDla

qaum ki rahbari us ke hisse mein thi

KHilqat-e-shahr sab us ke halqe mein thi

be-zaban

KHilqat-e-shahr-e-azurdagan

aasman se utari gai mushkilon se nabard-azma nim-jaan

apni haalat pe nauha-kunan

aur wo

har nafas dewtaon ki hamd-o-munajat mein musta'id

ek nurani bahrup

jis ke tawassul se is shahr-e-zulmat mein

mushkilon ke KHudaon ki sari KHudai

bahut shan se

zindagi ke shajar se KHaraj-e-musalsal talab kar rahi thi

ibn-e-adna ne nichi nigahon se kul dewtaon ko ta'zim di

dil mein aai ki main markaz-e-ta'at-o-zuhd hun

main zamin par KHudaon ka naeb hun

aur qadr-o-qimat mein nayab hun

KHilqat-e-'am bhi mere jadu ki muTThi mein hai

KHilqat-e-'am jis ke lahu aur pasine se

in ma'badon aur mahlon ki inTon ka gara banaya gaya

ek lamhe ko kuchh yaad aaya

magar

is se pahle ki harf-e-talab

aur harf-e-shikayat ki talKHi zaban-gir ho

ek aahaT hui

mahzar-e-KHas ke dar pe

donon taraf

us ke jaise

kai ibn-e-adna

mahaz ek ishaare pe

KHalq-e-KHuda ke lahu se

mahallat ke baam-o-dar pe nai naqsh-arai ke muntazir

dast-basta dikhai diye

aur wo

be-jhijhak sajda-e-shukr mein gir gaya